हामी सबैकाे संसारन्यूज

काठमाडौँ । प्रतिनिधि सभाका सांसद चित्र बहादुर केसीले अहिलेको शिक्षा प्रणालीले नयाँ पीढीलाई स्वदेशमा रहने आशा जगाउन नसकेको बताएका छन् ।

उनले १८ महिनामा तीन पटक गठबन्धन फेर्ने सरकारबाट नयाँ पीढीले केही आशा गर्न नसकेको बताए । राष्ट्रिय जनमोर्चाका अध्यक्ष समेत रहेका केसीले शिक्षा प्रणालीमा सुधार हुन नसक्दा नयाँ पीढी अत्यन्त निराश र विचलित बताएको बताए ।

‘हामी यो सदन सम्म युवा र विद्यार्थीबाट आएका होइनौँ ? हामी विद्यार्थी छँदै राष्ट्रयता, लोकतन्त्र र गणतन्त्रको पक्षमा लडेका होइनौ ?’ उनले भने, ‘अहिलेका नयाँ पुस्तालाई साधौँ, उनीहरू किन निराश छन् ? उनीहरू निराश हुनु राष्ट्र र जनताप्रति ओठ लेप्र्याउनु, विदेश बाहेक अरू विकल्प नदेख्नुका पछाडि हामी जिम्मेवार छौँ, हाम्रो शिक्षा प्रणाली जिम्मेवार छ ।’

उनले नेताहरूले राजनीति देश र जनताको लागि नगरेर आफ्ना लागि गर्दा लाखौँ लाख नेपालीहरू देश छोड्न बाध्य भएको बताए । ‘शारीरिक श्रम मात्र होइन मानसिक रूपमा तयार नगरेको भए भूमिगत बस्ने, जेल बस्ने, कुटपिट सहने, त्यस्तो किन गर्थ्यौँ हामी ।’ मानसिक रूपमा आशा जगाउने शिक्षा प्रणाली विकसित गर्नुपर्नेमा उनको जोड छ ।

केसीले हालको शिक्षा प्रणालीले विदेश जाने र उतै बस्ने मानसिकतामा सहयोग गरेकाले देश उजाड बन्दै गइरहेको बताए । उनले शिक्षा प्रणालीमा सुधार गरेर युवाहरूलाई स्वदेशमै रोक्नुपर्नेमा जाेड दिए ।