Sansar News
काठमाडौँ । राष्ट्रिय स्वतन्त्र पार्टी (रास्वपा)को महामन्त्रीबाट बर्खास्त भएका मुकुल ढकालले सभापति रवि लामिछानेमाथि प्रश्न उठाएका छन् । उनले बुधवार पत्रकार सम्मेलन गर्दै लामिछानेविरुद्ध छानबिन गर्न माग गरेका छन् ।
उनले गएको १९ गतेको बैठकमा मुखमा कालो टेप लगाएर बस्नु आफ्नो कमजोरी भएको स्वीकार गरे । तर, त्यसपछि आफूले सभापतिसँग संवाद गर्न खोजे पनि नमानेको ढकालले बताए ।
ढकालले सहकारी ठगी प्रकरणमा छानबिन गर्न माग गरे । पछिल्लो पटक सर्वोच्च अदालतले नै लामिछानेमाथि अनुसन्धान गर्नुपर्छ भनिसकेको भन्दै उनले भने, ‘यसमा रास्वपाको धारणा के छ ? पार्टीले स्वतन्त्र छानबिन समिति गठन गर्नुपर्छ ।’
उनले लामिछानेको पासपोर्ट प्रकरणबारे पनि पार्टीले छानबिन गर्नुपर्ने उनको माग छ । यो मुद्दामा उनी दोषी ठहर भए भोलिका दिनमा चुनाव नै लड्न नपाउने भन्दै उनले भने, ‘यो पार्टी जीवनसँग जोडिएकाले उच्चस्तरीय छानबिन गर्नुपर्छ ।’
ढकालले मिडियामा आफूले आफ्नो प्रतिवेदनको केही अंश दिएको भन्दै सरकारको विषयमा रवि लामिछानेले नबोल्न दबाब दिएको बताए । उनले पार्टी बिग्रियो र जोगाउनुपर्छ भन्दा ज्वाला सङ्ग्रौला र रमेश प्रसाईँहरूलाई परिचालन गरेर मुकुल ढकाल रवि लामिछानेको विपक्षमा गयो भन्ने माहौल सिर्जना गरिएको बताए ।
उनले मूल विवाद सरकारले काम गर्न सकेन भनेर आफूले भनौँ भन्दा गृह मन्त्रालयले जति अरूले नगरेको भनेपछि आफूलाई चित्त नबुझेको बताए । ढकालले रवि लामिछानेले कुनै पनि कुराको जिम्मेवारी नलिने गरेको आरोप पनि लगाए ।
वि.सं.२०८१ असार २६ बुधवार १६:०९ मा प्रकाशित
