हामी सबैकाे संसारन्यूज

काठमाडौँ । नेपाल विद्युत् प्राधिकरणले जगदम्बा सिन्थेटिक्स र हुलास स्टिलको लाइन काटेको छ । डेडिकेटेड फिडर तथा ट्रंक लाइनको बक्यौता नतिरेको भन्दै प्राधिकरणले यी दुई उद्योगको लाइन काटेको हो ।

प्राधिकरणका अनुसार जगदम्बा सिन्थेटिक्सले प्राधिकरणलाई १६ करोड ४ लाख र हुलास स्टिलले ११ करोड २९ लाख रुपैयाँ बक्यौता तिर्न बाँकी छ ।

उद्योगहरुले डेडिकेटेड फिडर तथा ट्रंक लाइनमार्फत विद्युत् प्रयोग गरेबापत २०७२ माघदेखि २०७५ वैशाखसम्मको ६ अर्ब ६० करोड ७८ लाख रुपैयाँ तिर्न बाँकी छ ।

यसअघि प्राधिकरणले यी दुईसहित अन्य बक्यौता तिर्न बाँकी उद्योगहरूको नाममा बक्यौता तिर्न असार ९ गते १५ दिने अल्टिमेटमसहित पत्र पठाएको थियो । तर, त्यस अवधिमा पनि उद्योगले बक्यौता तिर्ने छाँटकाँट नदेखाएपछि लाइन काटेको प्राधिकरणले जनाएको छ ।