हामी सबैकाे संसारन्यूज

काठमाडौँ । चार बिस कटेका एक वृद्धलाई ५८ लाख बढी रकम ठगी गरेको आरोप लागेको छ ।

ललितपुरको महालक्ष्मी नगरपालिका–२ का ८१ वर्षीय रामप्रसाद पौड्याल ५८ लाख रकम ठगी गरेको आरोपमा पक्राउ परेका छन् । लोकेन्द्र नारायण श्रेष्ठको जाहेरीले उनलाई बैङ्किङ कसुरको मुद्दामा बिगो बराबरको ५८ लाख २१ हजार जरिवाना र ७ दिन कैदको सजाय सुनाइएको थियो ।

त्यसै गरी क्षतिपूर्ति शुल्कबापत २ लाख ३२ हजार ८४० रुपैयाँ समेत दिलाउन भन्दै उच्च अदालत पाटनका न्यायाधीश लोहित चन्द शाह र ईश्वरराज आचार्यको इजलासले १६ मङ्सिर २०७७ मा फैसला सुनाएको थियो ।

उनले एक महिनाभित्र फिर्ता दिन्छु भन्दै श्रेष्ठको ५८ लाख २१ हजार रुपैयाँ सापटी लगेका थिए । पटक–पटक रकम फिर्ताका लागि मागेपछि उनले सनराइज बैङ्कको खाताबाट दुई वटा चेकमार्फत ५८ लाख २१ हजार रकम उल्लेख गरेर दिएका थिए । उक्त चेक बाउन्स भएपछि उनले कानुन प्रक्रिया अघि बढाएका थिए ।

झम्सी खेलबाट पक्राउ परेका ८१ वर्षीय वृद्ध पौड्याललाई फैसला कार्यान्वयनका लागि ललितपुरको नख्खु कारागार पठाइएको छ ।