Sansar News
स्याङ्जा । सहकारी ठगी प्रकरणमा स्याङ्जाको बिरुवा गाउँपालिकाका अध्यक्ष सूर्यबहादुर कुवरलाई पक्राउ पुर्जी जारी गरिएको छ ।
स्याङ्जाको बाड्खोलामा मुख्य कार्यालय रहेको सूर्योदय सहकारी अन्तरगत बिरुवा सेवा केन्द्रको तीन करोड बढी रकम हिनामिना गरेको आरोप लागेका कुवर हाल फरार छन् । कुवर सूर्योदय सहकारी अन्तरगत बिरुवा सेवा केन्द्रको २०७६/७७ मा सचिव थिए ।
यसैबिच सोही सहकारी ठगी प्रकरणको आरोपमा तीन जना पक्राउ परेका छन् । जिल्ला प्रहरी कार्यालय स्याङ्जाका निमित्त सूचना अधिकारी उमेशलाल श्रेष्ठका अनुसार सहकारीका अध्यक्ष तारेन्द्र बहादुर केसी, मुक्तिनाथ विकास बैङ्क बिरुवामा कार्यरत सन्ध्या भण्डारी, सहकारीका प्रबन्धक जीवन वाग्ले पक्राउ परेका हुन् ।
उनीहरू मध्ये केसी र भण्डारी मङ्गलवार पक्राउ परेका हुन् भने वाग्ले १९ दिन अघि पक्राउ परेका हुन् । दोषी उपर थप अनुसन्धान अघि बढेको प्रहरीको भनाई छ ।
वि.सं.२०८१ साउन ३० बुधवार १८:०५ मा प्रकाशित
