हामी सबैकाे संसारन्यूज

काठमाडौँ महा नगरपालिकाका मेयर बालेन्द्र शाह ‘बालेन’ले बागमती, विष्णुमती र टुकुचाको सन्दर्भमा केही राजनीतिक दलहरूले भ्रम फिँजाएको बताएका छन् ।

उनले सामाजिक सञ्जालमार्फत सर्वोच्च अदालतको आदेश आएपछि बागमती, विष्णुमतीमा ४० मिटर र टुकुचाको २० मिटर वरिपरि निर्माण निषेधित क्षेत्र भनेर जानकारी गराएको उल्लेख गरेका छन् । तर, काठमाडौँ महानगरले सर्वोच्चको आदेशलाई सूचित गर्दै नागरिकमा दिएको जानकारीलाई महानगरको निर्णय भनी गलत व्याख्या गरेर पार्टीको नेता कार्यकर्ताहरूले जनता माझ भ्रम सिर्जना गरेको बताएका छन् ।

‘निषेधित क्षेत्र सर्वोच्चले भनेको हो, हामीले सर्वोच्चको आदेश अनुसार त्यो जग्गामा अब थप संरचना बनाउन पाइने छैन भनेर सूचित मात्र गराएका हौँ ।’ बालेनले लेखेका छन्, ‘अदालतको आदेश अनुसार नागरिकले आफ्नो जग्गा उपभोग गर्नबाट रोकेको छैन । नेपाल सरकारले चाहेमा मुआब्जा दिएर मात्र जग्गा अधिग्रहण गर्न सक्ने छ ।’

उनले कागले कान लग्यो भनेर हल्ला गर्दैमा कागको पछि नलाग्न र आफ्नो कान छाम्न सम्बन्धित सबैलाई सचेत गराएका छन् ।