हामी सबैकाे संसारन्यूज

काठमाडौँ । चालु आर्थिक वर्षको साउन महिनामा तीन सय बढी इलेक्ट्रिक कार, जिप र भ्यान(इभी गाडी) नेपाल भित्रिएका छन् । भन्सार विभागले सार्वजनिक गरेको तथ्याङ्क अनुसार चालु आर्थिक वर्षको पहिलो महिनामा तीन सय ७८ वटा इभी गाडी भित्रिएको हो ।

साउन महिनामा एक सय एक किलोवाटदेखि दुई किलोवाट क्षमताका एक वटा इभी भित्रिएको छ । त्यस्तै, ५१ किलोवाटदेखि एक किलोवाट सम्मका इभी गाडी दुई सय १६ वटा र ५० किलोवाटका इभी गाडी जम्मा एक सय ६१ वटा आयात भएका छन् ।

यी गाडी खरिद गर्न नेपाली व्यवसायीहरूले साउन महिनामा मात्रै ८७ करोड ९५ लाख ६७ हजार रुपैयाँ खर्च गरेका छन् । जसबाट सरकारले इलेक्ट्रिक कार, जिप र भ्यान (इभी गाडी) आयात मार्फत ५० करोड १२ लाख ९७ हजार रुपैयाँ राजस्व सङ्कलन गरेको छ ।

गत आर्थिक वर्षको असार मसान्तसम्म ११ हजार भन्दा बढी गाडी भित्रिएको थियो । नेपालमा ५० किलोवाटको चार हजार पाँच सय ७१ वटा गाडी भित्रिएका थिए । त्यसै गरी, ५१ किलोवाटदेखि एक सय किलोवाटसम्मको गाडी छ हजार आठ सय ८५ वटा र एक सय एक किलोवाटदेखि दुई किलोवाटका दुई सय १७ वटा गाडी आयात भएका थिए ।

त्यस्तै, २०७९/८० मा इलेक्ट्रिक कार, जिप र भ्यान (इभी गाडी) कुल चार हजार ४६ वटा भित्रिएका थिए । जसका लागि नेपाली व्यवसायीले ११ अर्ब ८१ करोड ४६ लाख ८० हजार रुपैयाँ खर्च गरेका थिए ।