Sansar News
कोलम्बो । श्रीलङ्काको आम निर्वाचनमा निवर्तमान राष्ट्रपति रनिल विक्रमसिंघेलाई वामपन्थी नेता अनुरा कुमारा दिसानायकेले उछिनेका छन् । दिसानायकेले शानदार जित हात पारेका छन् । उनी श्रीलङ्काका आगामी राष्ट्रपति हुनेछन् । श्रीलङ्कामा १०औँ राष्ट्रपति चयन गर्न सेप्टेम्बर २१ मा मतदान भएको थियो ।
हिजै साँझ ५ बजेदेखि मतगणना सुरु भएको थियो । एक करोड ७० लाख मतदाताहरूमध्ये करिब ७५ प्रतिशत राष्ट्रपतिको निर्वाचनमा मताधिकार प्रयोग गरेका थिए । सन् २०१९ को नोभेम्बरमा भएको पछिल्लो निर्वाचनमा ८३ प्रतिशत मतदान भएको थियो । यो अहिलेसम्मकै धेरै थियो ।
श्रीलङ्का निर्वाचन आयोगको आकडाअनुसार वामपन्थी नेता अनुरा कुमारा दिसनायकेले ५२ प्रतिशत मत पाएका छन् । दिसानायके नेशनल पीपुल्स पावर (एनपीपी) गठबन्धनका उम्मेदवार हुन् । १६ प्रतिशत मात्रै मत पाएर निवर्तमान राष्ट्रपति रनिल विक्रमसिंघे तेस्रो स्थानमा छन् । साजिश प्रेमदासा २२ प्रतिशत मतसहित दोस्रो स्थानमा छन् । प्रेमदासा एक पटक फेरि मुख्य प्रतिपक्ष बन्नेछन् ।
वि.सं.२०८१ असोज ६ आइतवार १२:४७ मा प्रकाशित
