हामी सबैकाे संसारन्यूज

काठमाडौँ । पूर्वप्रधानमन्त्री तथा नेपाल समाजवादी पार्टी (नयाँ शक्ति)का अध्यक्ष डा.बाबुराम भट्टराईले आफल्गुन १ गतेलाई नेपालमा भएका सम्पूर्ण आन्दोलन तथा सङ्घर्षका प्रतिकका रूपमा जनक्रान्ति दिवसका रूपमा मनाउने प्रस्ताव गरेका छन् । उनले सामाजिक सञ्जाल फेसबुकमा एक स्ट्याटस लेख्दै जुँगाको लडाई छाडेर फागुन १ लाई जनक्रान्ति दिवसका मनाउन प्रस्ताव गरेका हुन् ।

उता माओवादीले फागुन १ लाई जनयुद्ध दिवस मनाइरहेको छ । ‘फागुन १ गते । नेपालको युगान्तकारी जनविद्रोह (जनयुद्ध) सुरु भएको दिन १ सङ्घीय लोकतान्त्रिक गणतन्त्रको वास्तविक जग खन्न सुरु गरेको दिन । त्यो महायज्ञमा अमूल्य ज्यान अर्पण गर्ने महान् शहीदहरू, वेपत्ताजन, घाइते÷अपाङ्ग योद्धाहरू सबैमा अन्तर्हृदय देखि उच्च सम्मान’, भट्टराईले जनयुद्धको स्मरण गर्दै बिहीबार स्ट्याटस लेखेका छन् ।

‘शब्दको जुँगाको लडाइँ छोडौँ । फागुन १ गतेलाई राज्य र सबै दल, जनताको तर्फबाट प्रत्येक वर्ष ‘जनक्रान्ति दिवस’ को रूपमा मनाऔँ !’, पूर्वप्रधानमन्त्री समेत रहेका भट्टराईले प्रस्ताव गर्दै भनेका छन् ।

उनले १९९७ सालको विद्रोह, २००७ सालको जनक्रान्ति, झापा जनविद्रोह, २०४६ सालको जनआन्दोलन, २०५२÷६२ सालको सशस्त्र जनयुद्ध, २०६२÷६३ सालको संयुक्त जनआन्दोलन, मधेस विद्रोह, थारु विद्रोह, आदिवासी जनजाति आन्दोलन लगायतका सबै आन्दोलन र क्रान्तिका कडीहरूलाई जोड्न पनि सुझाव दिएका छन् ।