हामी सबैकाे संसारन्यूज

काठमाडौँ । गणतन्त्र तथा राष्ट्रियताको रक्षा र सङ्घीयता खारेजीका लागि राष्ट्रिय जनमोर्चाले आन्दोलनका कार्यक्रम घोषणा गरेको छ ।
जनमोर्चाले शुक्रवार राजधानीमा पत्रकार सम्मेलन गर्दै आगामी चैत २४ गतेदेखि ३० गतेसम्म सप्ताहव्यापी राजधानी केन्द्रित आन्दोलन सञ्चालन गर्ने घोषणा गरेको हो ।

अध्यक्ष चित्रबहादुर केसीले राष्ट्रियता र आर्थिक स्थायित्वका लागि सङ्घीयता ठुलो बोझ भएको भन्दै खारेजी जरुरी रहेको बताए । उनले पूर्व राजा ज्ञानेन्द्र शाहको फागुन ७ गतेको सन्देश, फागुन २५ गते आयोजित राजावादी शक्ति प्रदर्शन, र चैत्र १५ गतेको हिंसात्मक घटनालाई प्रतिगमनको गम्भीर सङ्केतको रूपमा व्याख्या गरे ।

आन्दोलन अन्तर्गत प्रत्येक दिन राजधानीका विभिन्न स्थानमा जुलुस, सभा, सांस्कृतिक कार्यक्रम र प्रचारात्मक अभियान सञ्चालन गरिने बताइएको छ ।

प्रत्येक दिन दिउँसो २ बजे शान्ति बाटिका (रत्नपार्क), चाबहिल चोक, माइतीघर मण्डला, गोङ्गबु चौक, न्यूरोड (भूगोल पार्क) र भृकुटीमण्डपमा आन्दोलन हुने छन् ।