Sansar News
पर्वत । राजेन्द्र अन्जना फाउन्डेशन र ARC for Nepal सहकार्यमा निर्माण हुन लागेको संसारा घरको शिलान्यास भएको छ ।गण्डकी प्रदेश सरकारका पर्यटन तथा उद्योग मन्त्री मित्रलाल बस्यालले पर्वत जिल्लाको पैयुं गाउपालिकामा सो घरको शिलान्यास गरेका छन् ।
यसक्रममा उनले प्रदेश सरकारबाट हुन सक्ने कुनै पनि सहयोगमा पछि नपर्ने बताएका थिए । कार्यक्रममा पैयुँ गाउँपालिकाका अध्यक्ष तोरण मल्ल ठकुरीले बिदेशमा रगत पसिना बगाएर आर्जेको सम्पत्ति आफ्नो गाउं र समाजको लागि खास गरी अनाथ, दलित, असहाय र निमुखा बालबालिकाहरुको लागि करोडौं खर्चेर सुबिधा सम्पन्न होस्टेल बनाउनु उच्चस्तरको समाजसेवा भनेका थिए । शैक्षिक बिकास, खानपान र बसोबासको लागि हाइस्कुल लेवल सम्म नै बस्ने र समयको माग अनुसारको शैक्षिक तथा प्राबिधिक शिक्षा उपलब्ध गराउन हरेक बालबालिकाहरुलाई कम्प्युटर उपलब्ध गराउने कार्यको लागी पालिकाले सहकार्य गरेर अगाडी बढ्न चाहेको कुरा पनी बताईएको थियो ।
संस्थाका प्रतिनिधि ज्ञानेन्द्र श्रेष्ठले अहिले शुरु गर्न लागिएको सम्सारा घर बनाउने प्रोजेक्टले दुई वर्षभित्र पूर्णता पाउने लक्ष्य राखेको छ र यसको लागत लगभग १० करोड नेपाली रुपैयाँ अनुमान गरिएको बताएका थिए ।
शिलान्यास भएको सम्साराघरमा ५० जना बालबालिकाका लागि सुरक्षित र स्वच्छ आवास, छात्र र छात्राहरूका लागि छुट्टाछुट्टै भवन, कम्प्युटर ल्याब, पुस्तकालय, १५० सिट क्षमताको अडिटोरियम, अन्तर्राष्ट्रिय स्वयंसेवकहरूको लागि अपार्टमेन्ट, आधारभूत प्रविधिक शिक्षा र डिजिटल साक्षरताको व्यवस्था, आवश्यकता अनुसार हरेक बालबालिकालाई कम्प्युटर उपलब्ध गराउने संरचना रहनेछ । संस्थाका अनुसार संस्थाले आत्मनिर्भरताको लागी भवन निर्माणको कार्य सम्पन्न भएपछि आवश्यक जग्गा उपलब्ध हुन सकेमा भैंसी, बाख्रा, कुखुरा पालन, साथै फलफूल तथा तरकारी उत्पादन गर्ने योजना बनाएको छ । बालबालिकाको पोषणमा योगदान पु¥याउने तथा स्थानिय रोजगारी सिर्जना गरि आर्थिक सशक्तिकरणमा समेत टेवा पु¥याउने लक्ष्य राखेको छ । सो काम सम्पादनका लागि स्थानीय नागरिक, वडा, पालिका, प्रदेश र संघ सरकारसँग हातेमालो गर्न संस्था तत्पर रहेको जनाईएको छ ।
बिबिध परिस्थिति र अवस्थाले उचित खानपान, वसोबास र शैक्षिक सुबिधाबाट बन्चित हुनुपरेका अनाथ, असहाय र लोपोन्मुख समुदायका बालबालिकाहरुको लागि निर्माण हुन लागेको उक्त भवन सुविधा सम्पन्न हुने राजेन्द्र अन्जना फाउन्डेशनका अध्यक्ष राजेन्द्र श्रेष्ठले बताए ।
वि.सं.२०८२ जेठ ४ आइतवार १७:५२ मा प्रकाशित
