Sansar News
काठमाडौँ । कैलाली कारागारमा थुनामा रहेका डडेलधुराका कैदीको मृत्यु भएको छ । कैदीको मृत्युभएपछि डडेलधुरा बजारमा आन्दोलन सुरु भएको छ ।
मृत्यु प्रकरणको निष्पक्ष छानबिनको माग गर्दै उद्योग वाणिज्य संघ डडेलधुराको नेतृत्वमा बजार बन्दसहित आन्दोलन सुरु भएको हो । बैंकिङ कसुरमा कैद सजाय भोगिरहेका २८ वर्षीय हरिश सिंह पालीको सेती अस्पतालमा उपचारका क्रममा मृत्यु भएको हो ।
असार २ गते पाली बिहान अचानक बिरामी परेपछि उपचारका लागि अस्पताल लगिएको थियो । तर, उपचारकै क्रममा उनको मृत्यु भएको कैलालीका प्रहरी नायब उपरीक्षक तथा प्रवक्ता राजकुमार सिंहले जानकारी दिए ।
मृतकको शव अहिले अस्पतालकै शव गृहमा राखिएको छ भने घटनाको अनुसन्धान भइरहेको प्रहरीले जनाएको छ । उता, पालीको मृत्युप्रति असन्तुष्टि जनाउँदै डडेलधुरा बजारमा बिहानैदेखि यातायात, व्यापार र अन्य सम्पूर्ण सेवा बन्द गरिएको छ ।
वि.सं.२०८२ असार ४ बुधवार ११:१९ मा प्रकाशित
