हामी सबैकाे संसारन्यूज

काठमाडौं । निर्वाचन आयोगले राष्ट्रिय प्रजातन्त्र पार्टी (राप्रपा)का पाँच जना नेताहरूमाथि कारबाहीको विषयलाई लिएर छानविन थालेको छ ।
नवराज सुवेदी, सगुनसुन्दर लावती, मुकुन्द श्याम गिरी, धवलशम्शेर राणा र धनशुर शाहीले आफुहरुलाई अवैधानिक तरिकाले कारबाही गरिएको भन्दै निवेदन दिएपछि आयोगले छानबिन थालेको हो ।

आयोगकी प्रवक्ता सीता पोखरेलले आफूहरूमाथि विधान विपरीत कारबाही गरेको भन्दै पाँच नेताहरूले उजुरी दिएपछि उनीहरुमाथि कारबाहीको विषयमा बुझ्न जानकारी माग गरेर राप्रपालाई पत्र पठाएको जानकारी दिइन ।

राप्रपा अध्यक्ष राजेन्द्र लिङदेनले हालै पार्टीको अनुशासन समिति अध्यक्षबाट सुवेदीलाई हटाएका थिए भने लावतीलाई प्रवक्ताबाट बर्खास्त गरेका थिए । यस्तै गिरीलाई पनि उनले उपाध्यक्षबाट पदमुक्त गरेका छन् ।

त्यसअघि लिङदेनले महामन्त्री डा. धवलशम्शेर राणाको संगठन विभाग प्रमुख पद खोसेका थिए भने संयोजित संगठन विभागका सदस्य सचिव धनशुर शाहीलाई पनि पदमुक्त गरेका थिए ।