हामी सबैकाे संसारन्यूज

काठमाडौं । सवारी साधनमा इम्बोस्ड नम्बर प्लेट अनिवार्य जडान गर्नुपर्ने भएको छ । मङ्गलवार भौतिक पूर्वाधार तथा यातायातमन्त्री देवेन्द्र दाहालको अध्यक्षतामा बसेको प्रदेशमन्त्री र सचिवहरू सम्मिलित विषयगत समितिको बैठकले २०८२ असोज १ देखि इम्बोस्ड नम्बर प्लेट अनिवार्य गर्ने निर्णय गरेको हो ।

सबै प्रदेशका यातायात व्यवस्था कार्यालयहरूले सवारी दर्ता, नामसारी र नवीकरणमा इम्बोस्ड नम्बर प्लेट जडानलाई अनिवार्य गर्नेछन् । यातायात व्यवस्था विभागले प्राविधिक सहयोग प्रदान गर्दै गृह मन्त्रालयसँग समन्वय गरी ट्राफिक प्रहरी परिचालित गरेर प्रभावकारी नियमन गर्ने निर्णय भएको छ ।

यसैगरी, सुरक्षण मुद्रण केन्द्र र यातायात व्यवस्था विभागबीच भएको सम्झौता अनुसार २०८२ भाद्र मसान्तभित्र सवारी चालक अनुमति पत्र छपाइ सुरु गर्ने र कोशी, बागमती र गण्डकी प्रदेशले खरिद प्रक्रिया अगाडि बढाएकोमा तत्काल छपाइ सुचारु गर्न अनुरोध गरिएको छ ।

बैठकले १० वर्षे सवारी चालक अनुमति पत्रको राजस्वमा एकरूपता, तथ्याङ्क डिजिटलाइजेशन, विद्युतीय भुक्तानी, सफ्टवेयर व्यवस्थापन, बेरुजू फछ्र्योट र राइड सेयरिङमा एकरूपता कायम गर्ने निर्णय गरेको छ । मन्त्री दाहालले सङ्घीयता कार्यान्वयन र नागरिक सेवालाई छरितो बनाउन तीन तहको समन्वय आवश्यक रहेको बताए ।