हामी सबैकाे संसारन्यूज

बेरुत। हिजबुल्लाहका प्रमुख नइम कासिमले लेबनान सरकारले समूहको निःशस्त्रीकरणका लागि दबाब दिएर देशलाई ‘इजरायलको शरणमा सुम्पेको’ आरोप लगाउँदै आफ्ना हतियार राख्न सङ्घर्ष गर्ने चेतावनी दिएका छन् ।

लामो समयदेखि लेबनानी लडाकू समूहलाई समर्थन गर्दै आएका इरानका शीर्ष सुरक्षा प्रमुख अली लारिजानीलाई भेटेपछि कासिमले टेलिभिजनमार्फत् सार्वजनिक सम्बोधनमा देशलाई कमजोर बनाइएको बताएका हुन।

हिजबुल्लाह गत वर्ष इजरायलसँगको युद्धबाट नराम्ररी कमजोर भएको थियो । अमेरिकी दबाबमा लेबनान सरकारले सेनालाई यस वर्षको अन्त्यसम्ममा हिजबुल्लाह समूहलाई निःशस्त्रीकरण गर्ने योजना बनाउन आदेश दिएको छ ।

इजरायली आक्रमणबाट प्यालेष्टिनी लडाकू समूह (हमास), इरानको सिरियाली सहयोगी इस्लामिक सङ्गठन र इरानको तथाकथित ‘प्रतिरोधको धुरी’ हिजबुल्लाहले पनि श्रृङ्खलाबद्ध असफलताहरू भोगेका छन् । हालै इरानले इजरायलसँगको १२ दिन लामो युद्ध र संयुक्त राज्य अमेरिकाको आक्रमणबाट आफ्नो आणविक स्थलहरूमा क्षतिको सामना गर्नुपरेको छ ।

कासिमले भने, “सरकारले गृहयुद्ध र आन्तरिक कलह निम्त्याए पनि प्रतिरोध अन्त्य गर्न अमेरिकी–इजरायली आदेश कार्यान्वयन गरिरहेको छ ।”

“जबसम्म आक्रामकता जारी रहन्छ, कब्जा कायम रहन्छ, तबसम्म हिजबुल्लाहले आफ्ना हतियारहरू समर्पण गर्दैन, र हामी यसको विरुद्ध लड्नेछौँ ।

यो अमेरिकी–इजरायली परियोजनाको सामना गर्न हिजबुल्लाह कुनै पनि अवस्थाको सामना गर्न तयार छ,” उनले भने ।

कासिमले सरकारलाई ‘अतृप्त इजरायली आक्रमणकारी वा असीम लालच भएको अमेरिकी तानाशाहलाई देश नसुम्पिन’ आग्रह गरेका छन् ।

उनले लेबनानको कुनै पनि आन्तरिक विष्फोट र विनाशको जिम्मेवारी सरकारले लिने बताउँदै लेबनानले देशलाई तहसनहस बनाएको आरोप लगाएका छन् ।

हिजबुल्लाह र यसको सहयोगी अमालले यस समयमा कुनै पनि सडक प्रदर्शनको आयोजना नगर्ने तर भविष्यमा त्यसो गनसक्र्ने चेतावनी उनले दिए ।

इजरायलसँगको युद्धअघि हिजबुल्लाह लेबनानी सेनाभन्दा राम्रो हतियार भएको विश्वास गरिन्थ्यो।

लेबनानलाई आक्रमणबाट जोगाउन उसले लामो समयदेखि आफ्नो हतियार सुरक्षित राख्नुपर्ने बताउँदै आएको थियो, तर आलोचकहरूले यसले राजनीतिक लाभका लागि आफ्नो हतियार प्रयोग गरेको आरोप लगाएका थिए।

इरानको सर्वोच्च राष्ट्रिय सुरक्षा परिषद्का प्रमुख लारिजानीले यसै साता बेरुतमा कासिम र राष्ट्रपति जोसेफ आओनसँग भेटवार्ता गरेका थिए ।
इरानले सरकारको निःशस्त्रीकरण योजनाको विरोध गर्दै सहयोग जारी राख्ने प्रतिबद्धता जनाएको छ ।

आओनले लारिजानीलाई देशको आन्तरिक मामिलामा कुनै पनि हस्तक्षेपलाई अस्वीकार गरेको र हिजबुल्लाहलाई निःशस्त्रीकरण गर्ने योजनामा इरानको भनाइलाई ‘गैर–रचनात्मक’ को संज्ञा दिएका छन् । (रासस/एएफपी)