हामी सबैकाे संसारन्यूज

काठमाडौँ  । नेपाल राष्ट्र बैंकले सार्वजानिक गरेको तथ्याङ्क अनुसार देशको अर्थतन्त्रमा सुधार आएको छ । अर्थतन्त्रका अधिकांश सूचकहरु सकारात्मक रहेको छ ।

बैंकले सार्वजनिक गरेको वार्षिक तथ्याङ्क अनुसार आर्थिक वृद्धिदर ४.६१ प्रतिशत रहेको अनुमान गरिएको छ, जुन अघिल्लो वर्षको ३.६७ प्रतिशत भन्दा बढी हो। वार्षिक औसत मुद्रास्फीति ४.०६ प्रतिशत रहँदा, अघिल्लो वर्षको ५.४४ प्रतिशतको तुलनामा घटेको देखिन्छ ।

त्यस्तै विप्रेषण आप्रवाहमा पनि उल्लेखनीय वृद्धि भएको छ । नेपाली रुपैयाँमा १९.२ प्रतिशत र अमेरिकी डलरमा १६.३ प्रतिशतले बढेको विप्रेषण आप्रवाह २०८२ असारमा १ खर्ब ८९ अर्ब ११ करोड पुगेको छ । कुल विदेशी विनिमय सञ्चिति अमेरिकी डलरमा १९ अर्ब ५० करोड पुगेको छ, जुन १५.४ महिनाको वस्तु तथा सेवा आयात धान्न पर्याप्त रहेको राष्ट्रिय बैंकले जनाएको छ।

शोधनान्तर स्थिति ५ खर्ब ९४ अर्ब ५४ करोडले बचतमा रहेको छ, अघिल्लो वर्षको ५ खर्ब २ अर्ब ४९ करोडको तुलनामा उल्लेख्य वृद्धि भएको छ । आयात १३.३ प्रतिशतले वृद्धि भए पनि निर्यात ८१.८ प्रतिशतले बढेको देखिन्छ, अघिल्लो वर्ष आयात १.२ प्रतिशतले र निर्यात ३ प्रतिशतले घटेको थियो ।

बैंक तथा वित्तीय संस्थाको निक्षेप सङ्कलन १२.६ प्रतिशतले वृद्धि भई रु.७२ खर्ब ६४ अर्ब पुगेको छ भने निजी क्षेत्रमा प्रवाहित कर्जा ८.४ प्रतिशतले वृद्धि भई ५४ खर्ब ९८ अर्ब पुगेको छ। मुलुकको मुद्राप्रदायमा पनि १२.५ प्रतिशतले वृद्धि देखिएको छ, अघिल्लो वर्षको १२.९ प्रतिशत वृद्धि सापेक्षमा स्थिर देखिन्छ।