हामी सबैकाे संसारन्यूज

काठमाडौँ । प्रधानमन्त्री सुशीला कार्कीले आज सात राजनीतिक दलका नेतासँग निर्वाचन तयारीबारे छलफल गर्ने भएकी छन् ।

प्रधानमन्त्रीको सचिवालयका अनुसार राष्ट्रिय मान्यता प्राप्त सात दलका दुई–दुई जना प्रतिनिधिसँग छलफल आज दिउँसो ४ बजेका लागि तय गरिएको छ ।

प्रधानमन्त्री कार्कीले यसअघि पनि आगामी फागुन २१ गतेका लागि तय भएको प्रतिनिधि सभा निर्वाचन तयारीका विषयमा विभिन्न दलका नेताहरूसँग छुट्टाछुट्टै रूपमा वार्ता गरेकी थिइन् । तर, यसपटक उनले सबै दलका प्रतिनिधिलाई एकैसाथ बोलाएर संयुक्त छलफल गर्न लागेकी हुन् ।

छलफलमा नेपाली कांग्रेस, नेकपा (एमाले), माओवादी केन्द्र, रास्वपा, राप्रपासहितका दलका नेताहरू सहभागी हुने प्रधानमन्त्रीको सचिवालयले जनाएको छ ।

भदौ २३ र २४ गतेको जेनजी आन्दोलनपछि तत्कालीन केपी शर्मा ओलीको सरकार हटेपछि बनेको कार्की नेतृत्वको सरकारले फागुन २१ गते निर्वाचन गराउने जिम्मेवारी पाएको छ ।

हाल दलहरूसँग पर्याप्त परामर्श नगरेको भन्दै आएको आलोचनाबीच प्रधानमन्त्रीले संयुक्त छलफल बोलाएकी हुन् ।