Sansar News
काठमाडौँ । इजरायलमा मारिएका नेपाली विद्यार्थी विपिन जोशीको आज कञ्चनपुरको महाकाली नदी किनारमा अन्त्येष्टि गरिँदै छ ।
उनको पार्थिव शरीर सोमबार बेलुका इजरायलबाट काठमाडौं हुँदै भीमदत्त नगरपालिका–३ भाषीस्थित घर पुर्याइएको थियो । राति ढिलो घर पुगेकाले आज बिहान ८ बजे भीमदत्त नगरपालिकाबाट शवयात्रा सुरु भई महाकाली नदीको भुजेला घाटमा अन्त्येष्टि गरिने परिवारले जनाएको छ ।
विपिनको शव परिवारलाई औपचारिक रूपमा हस्तान्तरण गर्न नेपालस्थित इजरायली दूतावासका अधिकारीहरू समेत भीमदत्त पुगेका छन् ।
दुई वर्षअघि अध्ययनका क्रममा इजरायल गएका विपिन जोशी हमास लडाकूहरूको नियन्त्रणमा परेपछि मारिएका थिए । तिहारको बेला विपिनको शव घर आइपुग्दा उनको परिवार र गाउँभर शोकमग्न वातावरण छाएको छ ।
वि.सं.२०८२ कात्तिक ४ मंगलवार ०८:३७ मा प्रकाशित
