Sansar News
रामपुर । पाल्पाको माथागढी गाउँपालिका–४ देउगीरमा कुटपिटबाट एक वृद्ध महिलाको मृत्यु भएको छ ।
गएराति झडेवा बस्ने ३७ वर्षीय मिनबहादुर विश्वकर्माले ७६ वर्षीया फूलमाया जिसीलाई कुटपिट गरी हत्या गरेको प्रहरीले जनाएको छ । घटनामा फूलमायाका श्रीमान् ८२ वर्षीय प्रेमबहादुर जिसी पनि घाइते भएका छन् ।
घाइते जिसीलाई उपचारका लागि लुम्बिनी मेडिकल कलेज पठाइएकोमा थप उपचारका लागि लुम्बिनी सिटी अस्पताल बुटवल रिफर गरिएको जिल्ला प्रहरी कार्यालय पाल्पाका प्रहरी नायब उपरीक्षक होमप्रकाश चौधरीले जानकारी दिए ।
प्रहरीका अनुसार गएराति करिब १२ः३५ बजे जानकारी पाउनासाथ प्रहरी चौकी माथा र जिल्ला प्रहरी कार्यालयबाट टोली खटिएको थियो । टोलीले घरमै लुकिरहेको अवस्थामा विश्वकर्मालाई पक्राउ गरेको हो ।
कुटपिटमा धारिलो हतियारसमेत प्रयोग भएको आशंका गरिएको छ । घटनाबारे थप अनुसन्धान भइरहेको प्रहरीले जनाएको छ ।
वि.सं.२०८२ कात्तिक ४ मंगलवार १३:५७ मा प्रकाशित
