हामी सबैकाे संसारन्यूज

भक्तपुर । नेपाल कम्युनिष्ट पार्टी (एमाले) का उपमहासचिव प्रदीप ज्ञवालीले आगामी मङ्सिरमा हुने महाधिवेशनले पार्टी नेतृत्वको अन्तिम फैसला गर्ने बताएका छन् ।

एमाले भक्तपुर जिल्ला कमिटीले आयोजना गरेको शुभकामना आदानप्रदान तथा चियापान कार्यक्रममा बोल्दै ज्ञवालीले निर्धारित मितिमा नै महाधिवेशन हुने र त्यही महाधिवेशनबाट नेतृत्वको टुंगो लाग्ने बताएका हुन् ।

तीन दिनसम्म चलेको केन्द्रीय कमिटी बैठकमा पार्टीका विषयमा विस्तृत छलफल भएको उल्लेख गर्दै उनले नेतृत्वमाथि उठेका प्रश्नहरूका समाधानका लागि महाधिवेशनको मिति तय गरिएको बताए ।

उनका अनुसार, “बैठकमा केही साथीहरूले नेतृत्वमाथि प्रश्न उठाएपछि हामीले त्यो अनुत्तरित राख्न चाहेनौँ । पार्टीको सार्वभौमसत्ता कार्यकर्तामै निहित हुन्छ, त्यसैले अब महाधिवेशनले कसलाई नेता बनाउने, कस्तो नीति लिने भन्ने निर्णय गर्छ, हामी त्यसैको पालना गर्छौँ ।”

कार्यक्रममा एमाले प्रचार विभाग प्रमुख राजेन्द्र गौतम, पोलिटब्यूरो सदस्य महेश बस्नेत, कांग्रेस भक्तपुर सभापति दुर्लभ थापा, एमाले जिल्ला अध्यक्ष बचन देउजा, उपाध्यक्ष तथा बागमती प्रदेशका स्वास्थ्यमन्त्री किरण थापालगायतले पनि ‘जेनजी’ आन्दोलनका घटनाको निष्पक्ष छानबिन गर्नुपर्नेमा जोड दिएका थिए ।