हामी सबैकाे संसारन्यूज

विराटनगर, मोरङ। निक्षेप तथा कर्जा सुरक्षण कोषले ऋणी र एकाघरको पति वा पत्नीको मृत्यु, अशक्तता वा परियोजना नष्ट हुँदा बैंक तथा वित्तीय संस्थाबाट प्रवाह हुने लघु कर्जामा हुन सक्ने नोक्सानी विरुद्ध सुरक्षा प्रदान गर्ने उद्देश्यले सञ्चालन गरेको लघु कर्जा अतिरिक्त सुरक्षण योजना, २०८२ अन्तर्गत आज सुनसरीको दुहवीमा रहेको फरवार्ड माइक्रोफाइनान्स लघुवित्त वित्तीय संस्था लिमिटेडले कोषसँग कर्जा सुरक्षणको सम्झौता गरेको छ।

सम्झौता कार्यक्रममा फरवार्ड लघुवित्तको नायब प्रमुख कार्यकारी अधिकृत, विभागीय प्रमुखहरू, र कोषका विभागीय प्रबन्धक तथा शाखा कार्यालयका कर्मचारीहरूको उपस्थितिमा दुबै संस्थाका प्रमुख कार्यकारी अधिकृतले सम्झौतापत्रमा हस्ताक्षर गरेका थिए।

उक्त सम्झौता अनुसार, फरवार्ड लघुवित्तले प्रवाह गरेको कर्जाको जानाजानी असफलतामा ७५ प्रतिशत र मृत्यु, अशक्तता वा परियोजना नष्टजस्ता परिस्थितिजन्य घटनाबाट कर्जा असफल भएको अवस्थामा १०० प्रतिशत दावी भुक्तानी कोषले गर्नेछ।

सम्झौता अनुसार योजनामा सदस्यता प्राप्त फरवार्ड लघुवित्तले नियमित वार्षिक सुरक्षण शुल्क ०.४ प्रतिशत तिर्नेछ र यसमा थप ०.१५ प्रतिशत शुल्क जोडिँदै कुल ०.५५ प्रतिशत सुरक्षण शुल्क तिर्नुपर्नेछ। यसरी, फरवार्ड लघुवित्तले विपन्न वर्गका व्यक्तिलाई लघु तथा साना उद्यम सञ्चालनका लागि प्रवाह गर्ने कर्जा पूर्णरूपमा सुरक्षित हुनेछन्।

यस सम्झौताबाट कर्जाको सुरक्षणका लागि आवश्यक चल–अचल सम्पत्तीको धितो लगायत अन्य जटिल व्यवस्था गर्नुपर्ने झन्झटबाट फरवार्ड लघुवित्तले मुक्त हुने अपेक्षा गरिएको छ। कोषले यस योजनाले ऋणी र कर्जा प्रदायक दुवैको सुरक्षामा योगदान पुर्याउने विश्वास व्यक्त गरेको छ।