हामी सबैकाे संसारन्यूज

ब्रसेल्स, बेल्जियम । इयूले चिनियाँ स्वामित्वको टिकटकलाई आफ्नो सामग्रीमा ‘लत’ लाग्ने खालका डिजाइन परिवर्तन गर्न वा इयूको डिजिटल सामग्री नियमहरू अन्तर्गत भारी जरिवानाको जोखिम लिन तयार रहन शुक्रबार निर्देशन दिएको छ।

दुई वर्ष अघि खोलिएको अनुसन्धानको प्रारम्भिक निष्कर्षमा युरोपेली आयोगले टिकटकले विशेष गरी नाबालिग र कमजोर वयस्कहरूमा एपको नकारात्मक प्रभावलाई सम्बोधन गर्न प्रभावकारी कदम नचालेको बताएको छ।

लत लाग्ने खालका अत्यधिक सामग्री प्रयोगका लागि सार्वजनिक गर्ने, स्वचालितरूपमा प्रशारण हुने, प्रचारात्मक सूचना र अत्यधिक व्यक्तिगत सिफारिस प्रणालीजस्ता सुविधाहरूले चिन्ता निम्त्याएको उल्लेख गर्दै आयोगका प्रवक्ता थोमस रेग्नियरले भने, “टिकटकको लत लाग्ने डिजाइन डिजिटल सेवा ऐनको उल्लङ्घन हो।”

“यी सुविधाहरूले विशेष गरी हाम्रा बच्चाहरूको लागि अनुप्रयोगको बाध्यकारी प्रयोगलाई निम्त्याउँछ, र यसले उनीहरूको मानसिक स्वास्थ्य र कल्याणको लागि ठूलो जोखिम निम्त्याउँछ,” रेग्नियरले भने ।

उनले थपे, “टिकटकले अपनाएका उपायहरू पर्याप्त छैनन्।”

टिकटकका प्रवक्ताले एक विज्ञप्तिमा भनेका छन्, “टिकटकले आयोगको निष्कर्षलाई अस्वीकार गरेको छ र यसले हाम्रो प्लेटफर्मको बारेमा स्पष्ट रूपमा गलत र पूर्ण रूपमा गुणस्तरहीन चित्रण प्रस्तुत गर्दछ।”

“हामी यी निष्कर्षहरूलाई चुनौती दिन आवश्यक सबै कदमहरू चाल्नेछौँ,“ उनले भने ।

तथ्याङ्क संरचना र ‘अल्गोरिदम’ विशाल प्रविधि कम्पनीको ज्यादतीलाई रोक्न हालैका वर्षहरूमा इयूले अपनाएको बलियो कानुनी शस्त्रागारको हिस्सा हो र अधिकारीहरूले अहिलेसम्म टिकटकले ब्लकको डिजिटल नियामकहरूसँग सहयोग गरिरहेको बताएका थिए।

उनले भने, “टिकटकले अब ईयूको निष्कर्षमा पहुँच पाउनेछ ताकि दाबीहरूको बिरूद्ध आफूलाई बचाउन सकियोस्।” (रासस÷एएफपी)