हामी सबैकाे संसारन्यूज

काठमाडौँ । निर्वाचन आयोग ले फागुन २१ गते हुने निर्वाचनलाई लक्षित गर्दै तीन दिन सार्वजनिक बिदा दिन सरकारलाई सिफारिस गरेको छ।

आयोगका कार्यवाहक प्रमुख निर्वाचन आयुक्त रामप्रसाद भण्डारी ले सबै मतदाताको सहभागिता सुनिश्चित गर्न फागुन २०, २१ र २२ गते सार्वजनिक बिदा दिन प्रस्ताव गरिएको जानकारी दिए। उनका अनुसार बिदा स्वीकृत गर्ने वा नगर्ने अन्तिम निर्णय भने सरकारकै अधिकार क्षेत्रभित्र पर्छ।

भण्डारीले भने, “हामीले निर्वाचनको समयमा मतदातालाई सहज वातावरण मिलोस् भन्ने उद्देश्यले तीन दिन बिदा सिफारिस गरेका छौँ। निर्णय भने सरकारले गर्नेछ।”

यदि आयोगको सिफारिस सरकारले स्वीकृत गरेमा लगातार सात दिन सार्वजनिक बिदा पर्न सक्ने देखिएको छ। फागुन १८ र १९ गते होली पर्व, त्यसपछि निर्वाचनसम्बन्धी बिदा, शनिबार र अन्तर्राष्ट्रिय नारी दिवस समेत परेकाले एक सातासम्म निरन्तर बिदा हुने सम्भावना रहेको छ।

यस विषयमा सरकारको निर्णय भने आउन बाँकी छ।