हामी सबैकाे संसारन्यूज

काठमाडौँ । मुक्तिनाथ विकास बैंक र ढुवानी व्यवसायी महासंघ नेपालबीच ढुवानी व्यवसायीलाई वित्तीय सेवा सहज बनाउने उद्देश्यले व्यावसायिक समझदारीपत्र (एमओयू) मा हस्ताक्षर भएको छ ।

सम्झौताअनुसार महासंघमा आबद्ध सदस्यहरूले आफ्नो व्यवसाय सञ्चालनका लागि आवश्यक पर्ने कुनै पनि ब्रान्डका सवारीसाधन खरिद गर्न तथा व्यवसाय विस्तारका लागि मुक्तिनाथ विकास बैंकबाट सरल र आकर्षक सहुलियतपूर्ण ब्याजदरमा कर्जा सुविधा प्राप्त गर्नेछन् ।

समझदारीपत्रमा बैंकका प्रमुख कार्यकारी अधिकृत (सीईओ) तारा मानन्धर र ढुवानी व्यवसायी महासंघका अध्यक्ष माधवप्रसाद नेपालले हस्ताक्षर गरेका हुन् । बैंकका प्रमुख सूचना अधिकारी तिलबहादुर गुरुङले उक्त जानकारी दिएका छन् ।

बैंकका अनुसार यस सहकार्यबाट ढुवानी व्यवसायीलाई सेवा तथा व्यवसाय विस्तारका लागि सहज रूपमा वित्तीय स्रोत उपलब्ध हुनुका साथै उनीहरूको व्यावसायिक क्षमता अभिवृद्धिमा समेत सहयोग पुग्ने अपेक्षा गरिएको छ ।

महासंघमा आबद्ध सदस्यहरूले देशभर रहेका बैंकका १७६ वटै शाखा कार्यालयबाट उक्त कर्जा सुविधा लिन सक्नेछन् ।

यसैबीच, मुक्तिनाथ विकास बैंकले आफ्ना ग्राहकका लागि अटो कर्जा, कृषि कर्जा तथा साना तथा मझौला व्यवसाय (एसएमई) कर्जामा न्यूनतम ब्याजदरमा कर्जा प्रवाह गर्ने विशेष योजना सञ्चालनमा ल्याएको जनाएको छ ।