हामी सबैकाे संसारन्यूज

काठमाडौँ । विगत केहि दिनदेखि नेपालका प्रमुख सहरहरूमा वायु प्रदूषणको स्तरले खतराको सीमा पार गरेको छ । वन तथा वातावरण मन्त्रालय अन्तर्गतको वातावरण विभागले सार्वजनिक गरेको पछिल्लो २४ घण्टाको तथ्याङ्कले जनस्वास्थ्यमा गम्भीर संकट निम्तिएको देखाएको हो । केहि दिन यता नेपालको आकाशभरि बाक्लो तुवाँलो देखिएको छ ।

पूर्वी पहाडी जिल्ला इलाममा वायु गुणस्तर सूचकांक १८९ माइक्रो ग्रामसम्म पुगेको छ । यो दर प्राविधिक दृष्टिकोणले मानिसका लागि ’अति अस्वस्थ’ मानिने तह हो । इलामसँगै दाङको देउखुरीमा वायु गुणस्तर सूचकांक १६९ माइक्रो ग्राम र भक्तपुरमा १६३ माइक्रो ग्राम मापन गरिएको छ । काठमाडौँ उपत्यकाभित्रको भैंसेपाटी र शंखपार्क क्षेत्रमा पनि प्रदूषणको मात्रा १५० माइक्रो ग्राम भन्दा माथि पुग्नुले अवस्था भयावह रहेको संकेत गरेको छ ।

त्यस्तै, हावामा मिसिएका घातक धुलोका कण (पिएम–१०) को मात्रा भक्तपुरमा प्रतिघनमिटर १४८.६ माइक्रोग्राम पुगेको छ । यसरी वायुमण्डलमा धुलो र धुवाँको मात्रा बढ्नुमा सवारी साधनको चाप र सुक्खा मौसम मुख्य कारण रहेको विज्ञहरूको भनाइ रहेको छ । अहिलेको अवस्थामा मुस्ताङबाहेक देशका अन्य अधिकांश सहरी क्षेत्र ’रेड जोन’ मा छन् । प्रदूषणका कारण श्वासप्रश्वास र आँखासम्बन्धी समस्या बढ्न सक्ने भएकाले स्वास्थ्य सतर्कता अपनाउन चिकित्सकहरूको सुझाब छ ।