हामी सबैकाे संसारन्यूज

काठमाडौं । राष्ट्रिय स्वतन्त्र पार्टी (रास्वपा) ले समानुपातिक निर्वाचन प्रणालीतर्फका ५७ जना सांसदको नामावली टुंगो लगाएको छ।

आइतबार काठमाडौंको च:मतीस्थित पार्टी कार्यालयमा बसेको सचिवालय बैठकले उक्त निर्णय गरेको हो। बैठकमा पार्टी सभापति रवि लामिछाने स्वास्थ्य अवस्थाका कारण प्रत्यक्ष उपस्थित नभई भर्चुअल माध्यमबाट सहभागी भएका थिए।

पार्टीका प्रवक्ता मनिष झाले बैठकले ५७ जनाको नाम निर्वाचन आयोगमा सिफारिस गर्ने निर्णय गरेको जानकारी दिए। उनका अनुसार सिफारिस गरिएका उम्मेदवारमध्ये ४८ जना महिला र ९ जना पुरुष रहेका छन्।

यद्यपि कसको नाम सिफारिस गरिएको हो भन्ने विस्तृत सूची भने पार्टीले सार्वजनिक गरेको छैन। प्रवक्ता झाले आवश्यक प्रक्रिया पूरा भएपछि निर्वाचन आयोगले नामावली सार्वजनिक गर्ने बताए।

पार्टीका अनुसार समानुपातिक कोटाअनुसार खस–आर्य समुदायबाट १७ जना, आदिवासी जनजातिबाट १६ जना, मुस्लिम समुदायबाट ३ जना, दलित समुदायबाट ८ जना, मधेशी समुदायबाट ९ जना र थारु समुदायबाट ४ जना सिफारिस गरिएको छ।