हामी सबैकाे संसारन्यूज

धादिङ । धादिङ जिल्लाका १३ वटै स्थानीय तहले संयुक्त विज्ञप्ति जारी गर्दै संघ तथा प्रदेश सरकारबाट स्थानीय तहको संवैधानिक अधिकारमा हस्तक्षेप नगर्न चेतावनी दिएका छन्।

नीलकण्ठ नगरपालिकाका प्रमुख भीमप्रसाद ढुंगानाको अध्यक्षतामा बसेको स्थानीय तहका प्रमुख तथा उपप्रमुखहरूको संयुक्त बैठकले नेपालको संविधान २०७२ को मर्मअनुसार संघ, प्रदेश र स्थानीय तहबीच सहकार्य, सहअस्तित्व र समन्वयको सिद्धान्तलाई पूर्ण रूपमा कार्यान्वयन गर्नुपर्नेमा जोड दिएको छ।

विज्ञप्तिमा संविधानको अनुसूची–८ मा व्यवस्था गरिएको एकल अधिकार सूचीअनुसार स्थानीय तहले आफ्नो अधिकार स्वतन्त्र रूपमा प्रयोग गर्न पाउनुपर्ने उल्लेख गर्दै त्यसमा अवरोध हुने खालका गतिविधिप्रति गम्भीर ध्यानाकर्षण गराइएको छ।

यसैबीच, हालै सम्पन्न प्रतिनिधिसभा निर्वाचनमार्फत निर्वाचित जनप्रतिनिधिहरूलाई बधाई दिँदै स्थिर सरकार, सुशासन र भ्रष्टाचारमुक्त शासन व्यवस्थाका लागि संघीय सरकारसँग सहकार्य गर्न स्थानीय तह प्रतिबद्ध रहेको पनि जनाइएको छ।

त्यसैगरी, संघ तथा प्रदेश सरकारबाट सञ्चालन हुने विकास निर्माण, सुशासन प्रवर्द्धन, भ्रष्टाचार नियन्त्रण, मितव्ययी खर्च व्यवस्थापन र योजनाबद्ध विकासका अभियानमा समन्वय र सहकार्य गर्न स्थानीय तह तयार रहेको विज्ञप्तिमा उल्लेख छ।

तर, संविधान र कानुनविपरीत जारी भएका निर्देशन तथा जिल्ला प्रशासन कार्यालयबाट जारी परिपत्रमार्फत स्थानीय तहको अधिकार क्षेत्रमा हस्तक्षेप गर्ने प्रयास भएको भन्दै त्यस्ता गतिविधिप्रति कडा आपत्ति जनाइएको छ।

स्थानीय तहहरूले संघीयताको मर्मअनुसार तीनै तहका सरकारबीच पारस्परिक सम्मान, विश्वास र समन्वय कायम गर्दै अघि बढ्न आग्रह गर्दै सम्बन्धित सबै सरोकारवालालाई सहकार्य र सहअस्तित्वलाई अझ सुदृढ बनाउन अपिल गरेका छन्।