हामी सबैकाे संसारन्यूज

काठमाडौं: सरकारले शनिबार र आइतबार दुई दिन सार्वजनिक बिदा दिने निर्णय गरेसँगै यस साता सेयर बजारमा केही असाधारण परिवर्तन आउने भएको छ। नेप्सेले पनि सरकारले घोषणा गरेको सार्वजनिक बिदासँगै आफ्नो कारोबार तालिका समायोजन गरेको छ।

आइतबार साँझ भएको नेप्से सञ्चालक समितिको बैठकले सोमबारदेखि शुक्रबारसम्म सेयर कारोबार सञ्चालन गर्ने निर्णय गरेको छ। नेप्सेका प्रमुख कार्यकारी अधिकृत चूडामणि चापागाईंले जानकारी दिँदै भने, “सरकारले शनिबार र आइतबार सार्वजनिक बिदा दिने निर्णय गरेपछि हामीले पनि शुक्रबार बजार सञ्चालन गर्ने निर्णय गरेका हौं। यसले लगानीकर्तालाई बजारमा उपस्थित हुने थप अवसर दिनेछ।”

सिईओ चापागाईंका अनुसार यो निर्णय यही सातादेखि लागू हुनेछ। उनले स्पष्ट पारे, “यस साता आइतबार बजार बन्द रहनेछ, तर शुक्रबार कारोबार खुल्नेछ। कारोबारको समय भने ११ बजेदेखि ३ बजेसम्म यथावत् रहनेछ।” यसअघि आइतबारदेखि बिहीबारसम्म नियमित रूपमा सेयर कारोबार हुँदै आएको थियो।

विशेषज्ञहरूले पनि यो कदमलाई लगानीकर्तालाई सहजता प्रदान गर्ने र बजारमा अनावश्यक अस्थिरता कम गर्ने उपायको रूपमा मूल्याङ्कन गरेका छन्। बजार खोल्ने निर्णयले कम्पनीहरूको शेयर मूल्य र लगानीकर्ताको व्यापारिक योजना बनाउनमा पनि प्रत्यक्ष प्रभाव पार्नेछ। यससँगै नेप्सेले आफ्नो समयतालिका सरकारको सार्वजनिक बिदासँग मिलाउँदै लगानीकर्ताका लागि सुविधा बढाएको छ।