हामी सबैकाे संसारन्यूज

काठमाडौं । राष्ट्रिय प्रजातन्त्र पार्टी (राप्रपा)का सांसद तथासंसदीय दलको नेता ज्ञानेन्द्र शाहीले जापानमा दिएको अभिव्यक्तिलाई लिएर सामाजिक सञ्जालमा व्यापक चर्चा र विवाद भएपछि उनले आफ्नो भनाइको आशयबारे प्रष्टीकरण दिएका छन्।

कर्णाली प्रवासी संघको निमन्त्रणामा जापान पुगेका शाहीले आयोजित विशेष अन्तरक्रिया कार्यक्रममा बोल्दै शाहीले विदेशमा बसेर सामाजिक सञ्जालमार्फत चरित्रहत्या, अपमानजनक सामग्री उत्पादन तथा विवाद सिर्जना गरेर आर्थिक लाभ लिने केही समूहको आलोचना गरेका थिए। उक्त अभिव्यक्तिपछि सामाजिक सञ्जालमा उनले सम्पूर्ण प्रवासी नेपाली समुदायलाई लक्षित गरेर टिप्पणी गरेको भन्दै आलोचना भएको थियो।

विवाद बढेपछि शाहीले सामाजिक सञ्जालमार्फत आफ्नो धारणा स्पष्ट पार्दै आफूले विदेशमा रहेका सबै नेपालीलाई लक्षित नगरेको बताएका छन्। उनले आफ्नो टिप्पणी विशेष रूपमा “टीओबी ग्याङ, गाँजा खाने गजेडीहरूको ग्याङ, सहकारी ठगहरूको ग्याङ, डिप्रेसनका रोगीहरू र खराने ग्याङका अन्धसमर्थक” भनेर उल्लेख गरेका केही समूहप्रति केन्द्रित रहेको दाबी गरेका छन्।

शाहीले ती समूहले अरूको चरित्रमाथि आक्रमण गर्ने, अपमानजनक सामग्री तयार पार्ने र विवाद सिर्जना गरेर पैसा कमाउने काम गरिरहेको आरोप लगाएका छन्। यस्ता सामग्री आफ्नै परिवारका सदस्यका अगाडि बसेर हेर्न वा सुन्न पनि नसकिने खालका हुने उनको भनाइ छ।

उनले महिलाको सम्मान नगर्ने, राष्ट्रको गरिमालाई बेवास्ता गर्ने र फरक विचार राख्ने व्यक्तिमाथि असहिष्णु व्यवहार गर्ने प्रवृत्तिको आफूले विरोध गरेको स्पष्ट पारे। “मैले विदेशमा रहेका सम्पूर्ण नेपालीलाई कुरा बुझ्दैनन् भनेको होइन। मेरो टिप्पणी त्यस्ता प्रवृत्तिप्रति हो, विदेशमा रहेका सबै नेपालीप्रति होइन,” उनले उल्लेख गरेका छन्।

शाहीले आलोचना लोकतान्त्रिक अधिकार भएको स्वीकार गर्दै आलोचना सत्यतथ्यमा आधारित, सभ्य, मर्यादित र जिम्मेवारीपूर्ण हुनुपर्ने धारणा पनि राखेका छन्।