हामी सबैकाे संसारन्यूज

काठमाडौं। सानीमा बैंकले आर्थिक वर्ष २०८२/८३ को असार मसान्तसम्म उत्साहजनक वित्तीय नतिजा सार्वजनिक गरेको छ। बैंकको करपछिको नाफा (Profit After Tax) अघिल्लो वर्षको सोही अवधिको तुलनामा ३८.०१ प्रतिशतले वृद्धि भई ३ अर्ब ५५ करोड रुपैयाँ पुगेको छ।

बैंकका अनुसार प्रति सेयर आम्दानी (EPS) पनि उल्लेख्य रूपमा बढेर २५.७५ रुपैयाँ पुगेको छ। अघिल्लो आर्थिक वर्षको सोही अवधिमा यो १८.९४ रुपैयाँ रहेको थियो। त्यसैगरी, बैंकको रिटर्न अन इक्विटी (ROE) ११.७० प्रतिशतबाट बढेर १४.३९ प्रतिशत पुगेको छ।

बैंकको प्रति सेयर वितरणयोग्य नाफा पनि वृद्धि हुँदै २०.८५ रुपैयाँ पुगेको छ, जुन गत वर्षको सोही अवधिमा १५.४८ रुपैयाँ थियो।

व्यवसाय विस्तारतर्फ पनि बैंकले सकारात्मक प्रगति गरेको छ। बैंकको कर्जा तथा सापटी (Net Loans and Advances) ११.१९ प्रतिशतले वृद्धि भई २ खर्ब ३ अर्ब ९९ करोड रुपैयाँ पुगेको छ। त्यसैगरी, कुल निक्षेप १०.८४ प्रतिशतले बढेर २ खर्ब ४९ अर्ब ९३ करोड रुपैयाँ पुगेको छ।

बैंकले आफ्नो पूँजीगत अवस्था पनि मजबुत बनाएको जनाएको छ। असार मसान्तसम्म टियर–१ क्यापिटल एडिक्वेसी रेसियो १०.१७ प्रतिशत तथा कुल क्यापिटल एडिक्वेसी रेसियो १३.१० प्रतिशत रहेको छ।

यता, बैंकको ग्रस नन–परफर्मिङ एसेट (NPA) पनि सुधारिएको छ। अघिल्लो वर्षको सोही अवधिमा ३.०१ प्रतिशत रहेको ग्रस एनपीए घटेर २.८७ प्रतिशत मा झरेको बैंकले जनाएको छ।

बैंकको वित्तीय सूचकहरूमा देखिएको सुधारले नाफा, पूँजीको अवस्था, निक्षेप तथा कर्जा विस्तारसँगै सम्पत्ति गुणस्तरमा समेत सकारात्मक प्रगति भएको संकेत गरेको छ।