Sansar News
इनरुवा । सुनसरीको देवानगञ्ज गाउँपालिका–३, कप्तानगञ्जमा दुई समुदायबीच भएको झडपपछि जारी गरिएको कर्फ्यु आदेश उल्लंघन गर्दै प्रदर्शनकारीले आगजनी, तोडफोड र सडक अवरोध गरेपछि अवस्था नियन्त्रणमा लिन नेपाली सेनालाई बख्तरबन्द गाडीसहित परिचालन गरिएको छ।
आइतबार राति भएको झडपका क्रममा प्रहरीले चलाएको गोली लागेर २४ वर्षीय ओमप्रकाश मेहताको मृत्यु भएपछि क्षेत्रको सुरक्षा अवस्था तनावग्रस्त बनेको थियो। त्यसपछि जिल्ला प्रशासन कार्यालयले कर्फ्यु आदेश जारी गरेको थियो।
तर, कर्फ्युका बाबजुद सोमबार बिहान ठूलो सङ्ख्यामा प्रदर्शनकारी सडकमा उत्रिएका थिए। उनीहरूले टायर बाल्दै प्रदर्शन गर्नुका साथै कप्तानगञ्ज क्षेत्रमा पाँचवटा पसलमा तोडफोड तथा आगजनी गरेका छन्। प्रदर्शनका कारण पूर्व–पश्चिम लोकमार्गसमेत अवरुद्ध भएको छ।
बढ्दो भीड नियन्त्रण गर्न नेपाल प्रहरी र सशस्त्र प्रहरीको प्रयास पर्याप्त नभएपछि नेपाली सेनालाई बख्तरबन्द गाडीसहित परिचालन गरिएको हो। हाल सुरक्षा उपस्थिति थप सुदृढ पार्दै अवस्था नियन्त्रणमा लिने प्रयास भइरहेको सुनसरीका प्रमुख जिल्ला अधिकारी वासुदेव घिमिरेले जानकारी दिए।
यस घटनापछि कप्तानगञ्ज र आसपासका क्षेत्रमा सुरक्षा व्यवस्था थप कडा पारिएको छ भने स्थानीय प्रशासनले सर्वसाधारणलाई अफवाहमा नलाग्न तथा शान्ति–सुरक्षा कायम राख्न सहयोग गर्न आग्रह गरेको छ।
वि.सं.२०८३ साउन ११ सोमवार १४:२७ मा प्रकाशित
