Sansar News
सुर्खेत । कर्णाली प्रदेशको पाँचौँ मुख्यमन्त्रीमा मंगलबहादुर शाही नियुक्त भएका छन्। प्रदेश प्रमुख यज्ञराज जोशीले नेपालको संविधानको धारा १६८ बमोजिम शाहीलाई मुख्यमन्त्रीमा नियुक्त गरेका हुन्।
नयाँ सत्ता समीकरणअनुसार नेकपा र नेकपा (एमाले) बीच भएको सहमतिपछि शाहीले दुवै दलका प्रदेशसभा सदस्यहरूको समर्थनसहित मुख्यमन्त्रीमा दाबी पेस गरेका थिए। आवश्यक बहुमत प्राप्त भएपछि प्रदेश प्रमुख जोशीले उनलाई कर्णाली प्रदेशको पाँचौँ मुख्यमन्त्रीमा नियुक्त गरेका हुन्।
यसअघि मुख्यमन्त्री रहेका यामलाल कँडेलले प्रदेशसभामा विश्वासको मत प्राप्त गर्न नसकेपछि सरकार अल्पमतमा परेको थियो। त्यसपछि संविधानअनुसार नयाँ सरकार गठनको प्रक्रिया सुरु भएको थियो।
मुगुबाट निर्वाचित शाही यसअघि कर्णाली प्रदेश सरकारमा भौतिक पूर्वाधार तथा सहरी विकास मन्त्रीका रूपमा कार्यरत थिए। विद्यार्थी राजनीतिबाट सार्वजनिक जीवन सुरु गरेका उनले १३ वर्ष शिक्षण पेसामा बिताएका थिए। त्यसपछि जनयुद्धमा पूर्णकालीन रूपमा सहभागी भएका शाही शान्ति प्रक्रियापछि पार्टीका विभिन्न संगठनात्मक तथा नेतृत्वदायी जिम्मेवारीमा सक्रिय रहे।
२०७९ सालको प्रदेशसभा निर्वाचनमा पहिलोपटक प्रदेशसभा सदस्य निर्वाचित भएका शाही हाल नेकपाका केन्द्रीय सदस्य तथा कर्णाली प्रदेश संसदीय दलका नेता हुन्। लामो राजनीतिक सङ्घर्ष, संगठन निर्माणको अनुभव र नयाँ सत्ता समीकरणको समर्थनका आधारमा उनी कर्णाली प्रदेश सरकारको नेतृत्वमा पुगेका छन्।
वि.सं.२०८३ साउन १३ बुधवार १७:३४ मा प्रकाशित
