हामी सबैकाे संसारन्यूज

मकवानपुर । हेटौंडा उपमहानगरपालिका–१५ स्थित सामुदायिक वन क्षेत्रमा बोराभित्र बाँधेर खाल्डोमा फालिएको अवस्थामा एक महिलाको शव फेला परेको छ।

प्रहरीका अनुसार साउन २२ गते दिउँसो करिब १ः५० बजे सेल्फी रोडस्थित सामुदायिक वन क्षेत्रमा सेतो बोराभित्र शव फालिएको अवस्थामा रहेको सूचना प्राप्त भएको थियो।

सूचना पाएलगत्तै इलाका प्रहरी कार्यालय पशुपतिनगरबाट खटिएको प्रहरी टोली घटनास्थलमा पुगेको थियो। प्रहरीले घटनास्थलको प्रारम्भिक अनुसन्धान तथा मुचुल्का प्रक्रिया अघि बढाएको जनाएको छ।

फेला परेको शवको पहिचान खुल्न सकेको छैन। शव कसरी त्यहाँ पुर्‍याइयो र घटनामा को–को संलग्न छन् भन्ने विषयमा प्रहरीले थप अनुसन्धान गरिरहेको जनाएको छ।

घटनाबारे विस्तृत विवरण अनुसन्धानपछि मात्रै खुल्ने प्रहरीले जनाएको छ।