हामी सबैकाे संसारन्यूज

प्युठानको स्वर्गद्वारी नगरपालिकाका विभिन्न स्थानमा खोलाको किनारमा पाँच जनाको बेवारिसे शव फेला परेको छ। बिहीबार बिहान करिब ७ः३० बजेको समयमा स्वर्गद्वारी नगरपालिकाका विभिन्न स्थानमा नाम, थर र वतन नखुलेका पाँच जनाको शव फेला परेको जिल्ला प्रहरी कार्यालय प्युठानले जनाएको छ।

प्रहरीका अनुसार स्वर्गद्वारी नगरपालिका–९ जुडापाटास्थित माडी खोलाको किनारमा करिब १२/१३ वर्षका बालकको शव फेला परेको छ। त्यस्तै, स्वर्गद्वारी–३ किमिचौरस्थित माडी खोलाको किनारमा कम्मरभन्दा माथिको भाग मात्रै रहेको पुरुषको शव फेला परेको छ।

स्वर्गद्वारी–४ गोठीबाङस्थित माडी खोलाको किनारमा एक महिलाको शव फेला परेको छ भने स्वर्गद्वारी–५ सरोजास्थित लुङ्ग्री खोलाको किनारमा दुई महिलाको शव फेला परेको प्रहरीले जनाएको छ। तीमध्ये एक शवको बायाँ खुट्टा घुँडाभन्दा तलको भाग नभएको अवस्थामा फेला परेको छ।

फेला परेका सबै शवको पहिचान हुन सकेको छैन। प्रहरीले शवको पहिचान तथा घटनाबारे थप अनुसन्धान गरिरहेको जनाएको छ। साथै, परिवारका कुनै सदस्य हराइरहेको भए जिल्ला प्रहरी कार्यालय प्युठानकाे  ९८५७८३७०४९, ९८५७८१५५५५ सम्पर्क नम्बरमा सम्पर्क गर्न अनुरोध गरिएको छ।