१ कात्तिक,दाङ । यहाँ पहिलोपटक सुविधासम्पन्न धर्मशाला निर्माण भएको छ । त्रिसिद्धेश्वरी मन्दिर व्यवस्थापन समितिले गत वर्ष सञ्चालन गरेको श्रीमद्भागवत महापुराण ज्ञान महायज्ञबाट सङ्कलन भएको रकमले धर्मशाला निर्माण भएको हो ।
महापुराणबाट सङ्कलन भएको रु ५८ लाख र समितिको रु चार लाख गरी रु ६२ लाखमा पहिलोपटक जिल्लाको तुलसीपुरस्थित त्रिसिद्धेश्वरी मन्दिर परिसरमा धर्मशाला निर्माण भएको हो । विभिन्न दाताले महायज्ञमा दान गरेको रकमबाट १२ कोठाको सुविधासम्पन्न धर्मशाला निर्माण भएको समितिका अध्यक्ष देवराज धितालले जानकारी दिनुभएको छ ।
धर्मशाला निर्माणका लागि यहाँका स्थानीयवासीले रु पाँच सय देखि दुई लाखसम्म महायज्ञमा दान दिएका थिए । धर्मशालामा यात्रु, भक्तजन र विभिन्न स्थानबाट आएका पर्यटकलाई आश्रयस्थल प्रदान गरिने बताइएको छ ।
धर्मशालाको आइतबार सांसद डिल्लीबहादुर चौधरीले उद्घाटन गर्नुभएको थियो । समितिका अध्यक्ष देवराज धितालका अनुसार अब केही दिन भित्र सो स्थानमा किरियापुत्री आवाससँगै मन्दिर परिसरमा वाटिका निर्माण गरिने छ । रासस
