Sansar News
२० भदौ, काठमाडौँ । साफ च्याम्पियनसिपको पहिलो खेलमा नेपाल पाकिस्तानसँग २–१ गोलअन्तरले पराजित भएको छ ।
बङ्गलादेशको ढाकामा मंगलबार सम्पन्न प्रतियोगितामा नेपाल पाकिस्तानसँग अन्तिम मिनेटमा पराजित भएको हो । पाकिस्तानका मोहमद अलीले खेलको अन्तिम मिनेटमा गोल गर्दै टोलीलाई महत्वपूर्ण तीन अङ्क दिलाए ।
पहिलो हाफमा एक–शून्यले पछि परेको अवस्थालाई उल्ट्याउँदै नेपालले बराबरी गोल गरेको थियो । नेपालका लागि बिमल घर्तिमगरले ८२ औँ मिनेटमा बराबरी गोल फर्काएका थिए ।
पहिलो हाफको ३७ औँ मिनेटमा पेनाल्टीमार्फत पाकिस्तानका मोहमद रिजाले गोल गर्दै अग्रता कायम गरेका थिए । जीतसँगै समूह ‘ए’ मा पाकिस्तानले तीन अङ्क जोडेको छ । नेपालले आगामी बिहीबार भूटान र शनिबार बङ्गलादेशको सामना गर्नेछ ।
साफ फुटबलको १२औँ संस्करणसम्म आइपुग्दा नेपालले उपाधि जित्न सकेको छैन । आजको हारसँगै साफ च्याम्पियनसिपमा पाकिस्तानविरुद्ध नेपालले खेलेका सात खेलमध्ये दुईमा जीत, तीनमा बराबरी र दुईमा पराजय भएको छ ।
वि.सं.२०७५ भदौ २० बुधवार ०८:४६ मा प्रकाशित
