Sansar News
काठमाडौँ । कविताको लघुतम रूप हाइकु र सेन्यु नेपाली साहित्यमा निकै लोकप्रिय देखिन्छ । हाइकु र सेन्युको सङ्क्षिप्तता र गुणवेत्ताका प्रभावले नेपाली साहित्यमा सयौँ हाइकुकार र केही सेन्युकारहरू देखा परिरहेका छन् ।
यसै क्रममा काठमाडौँका ६६ वर्षीय प्रदीप केसी (सञ्जेल)ले ’तृषित मन’हाइकु ÷सेन्युसङ्ग्रह प्रकाशनमा ल्याएका छन् । उनले हाइकु र सेन्यु गरी ९५८ वटा रचनालाई आफ्नो कृति ’तृषित मन’मा समेटेका छन् ।
कार्यक्रमका प्रमुख अतिथि नेपाल प्रज्ञा–प्रतिष्ठानका निवर्तमान प्राज्ञ परिषद् सदस्य ,वरिष्ठ समालोचक तथा कवि डा. मधुसूदन गिरीले ’तृषित मन’ हाइकु /सेन्यु सङ्ग्रहको लोकार्पण गर्दै हाइकु र सेन्युलाई बौद्धिक जडताभन्दा पनि सरल र सहज किसिमले रचना गर्न जोड दिए । हाइकु रचना प्रकृतिलाई हेर्ने जीवन दर्शन भएकाले यसमा नेपाली मौलिकता, माटो र समाजको सुगन्ध आउनुपर्ने विचार व्यक्त गर्दै हाइजिन प्रदीप केसीका हाइकु र सेन्युमा समाजको विविधता आउनु भनेको तृषित मनको महत्त्वपूर्ण पक्ष रहेको बताए ।
विशेष अतिथि, नेपाल प्रज्ञा–प्रतिष्ठानका निवर्तमान प्राज्ञसभा सदस्य,नेपाल हाइकु सङ्घका केन्द्रीय अध्यक्ष तथा ’तृषित मन’ हाइकु /सेन्युसङ्ग्रहका भूमिकाकार चेतनाथ धमलाले लघुतम हाइकु र सेन्युको संरचना र सिर्जनशीलता बारे प्रष्ट पार्दै हाइकुकार प्रदीप केसीको रचनाधर्मिता बारे प्रकाश पारे ।
अतिथि त्रय नेपालभाषाका हाइकुकवि तथा सःदबू साहित्य ललितपुरका संयोजक सुधीर ख्वबी, प्रलेसका केन्द्रीय पार्षद सृजना सरोवर र पूर्व बिगेडियर जनरल रामचन्द्र खत्रीले कृतिगत शुभकामना व्यक्त गरे ।
कार्यक्रममा ’तृषित मन’ हाइकु /सेन्यु सङ्ग्रहका स्रष्टा प्रदीप केसीले आफूले प्रकृति र धार्मिक सांस्कृतिक पक्षलाई आत्मसात् गर्दै तिनको सिर्जना गरेको बताए । केसी शुभेच्छुकहरूबाट सम्मानित समेत भए।
उक्त सङ्ग्रहका प्रकाशक ,मानव अधिकार तथा एकल महिला समूहका केन्द्रीय सदस्य प्रतिभा विष्टको अध्यक्षतामा कार्यक्रम सम्पन्न भयो । स्वयम्भू कारखानाचोकमा रहेको क्वालिटी दरबार रेस्टुरेन्टमा ऐरावती प्रकाशनले कार्यक्रमको आयोजना गरेको थियोे।
प्रकाशनका अध्यक्ष तथा कवि रामदेव पाण्डेले आकर्षक ढङ्गबाट कार्यक्रमको सञ्चालन गरेका थिए ।
सम्प्रेषण : चेतनाथ धमला
वि.सं.२०८३ जेठ १६ शनिवार ०७:२५ मा प्रकाशित
