हामी सबैकाे संसारन्यूज

६ असोज, नयाँ दिल्ली । सिन्ह्वा भारत अधीनस्थ काश्मिरका केही प्रहरी अधिकारीले असुरक्षाको कारण देखाई प्रहरी सेवाबाट राजिनामा दिएका छन् ।

सो क्षेत्रमा कार्यरत दुई दर्जनभन्दा बढी प्रहरी अधिकारीले आफ्नो पदबाट राजिनामा दिएका भारतीय सञ्चारमाध्यमले जनाएका छन्

उनीहरुले पछिल्ला समयमा सशस्त्र हतियारधारी आतङ्ककारी समूहका तर्फबाट भारतीय प्रहरीमाथि आक्रमण बढेको भन्दै सेवा छोड्न इच्छुक रहेको बताएका हुन् ।

उक्त क्षेत्रमा पछिल्लो समयमा अज्ञात समूहले आक्रमणका घटना बढाएपछि पछिल्ला केही दिनयता प्रहरीमाथि भएका आक्रमणबाट तीनजना वरिष्ठ प्रहरी अधिकारी नै मरिसकेको छन् ।

सो हमलापछि पछिल्लो समयमा प्रहरी सेवामा असुरक्षाको त्रास बढ्नुका साथै प्रहरी अधिकारी नै प्रहरी सेवामा रहेर काम गर्न नसक्ने बताउन थालेका छन् ।

तर भारतको गृह मन्त्रालयले भने सो समाचारको खण्डन गरेको छ । उक्त मन्त्रालयले प्रहरी अधिकृतबाट त्यस्तो राजिनामा नआएको जनाएको छ ।

प्रहरीका अधिकारीले आफूहरुले असुरक्षाका कारण काश्मिरमा काम गर्न नसकेको भन्दै जागिरबाट मुक्ति चाहिएको भिडियोसमेत सार्वजनिक गरेका छन् ।

सो भिडियो क्लिप्स सामाजिक सञ्जालमा व्यापकता पाएपछि मन्त्रालयको तर्फबाट यो प्रतिक्रिया आएको जनाइएको छ ।

भारतको गृह मन्त्रालयले शनिबार एक विज्ञप्ति प्रकाशन गरी यस समाचारको खण्डन गरी ती प्रहरी अधिकारीले प्रहरी सेवामा रहेर काम गर्न इच्छुक नरहेको भनी दिएको भनिएको राजिनामालाई एउटा गलत समाचार भनेको छ ।

यो समाचार काश्मिरमा रहेर काम गरिरहेका सुरक्षा निकायका विरुद्धमा आएको एउटा ‘अतिरञ्जित’ भनी भारतीय सो मन्त्रालयले शनिबार जनाएको छ ।

सो मन्त्रालययले प्रहरीसम्बन्धी गलत समाचार आएको भनी खण्डन गरेपनि शनिबार प्रकाशित भएका भारतीय अखबारमा भने निकै प्राथमिकताका साथ आएको भारतीय राजधानी नयाँ दिल्लीबाट प्राप्त समाचारमा जनाइएको छ ।