हामी सबैकाे संसारन्यूज

१२ असोज, काठमाडौं । गत वर्ष साउन महिनामै ७३ करोड रुपैयाँ आन्तरिक ऋण उठाएको सरकारले यो वर्ष अहिलेसम्म यस्तो ऋण उठाएको छैन । चालु आर्थिक वर्ष (०७५÷७६) को दुई महिना बितिसक्दा पनि सरकार बल्ल आन्तरिक ऋण उठाउने क्यालेन्डर पारित गर्ने प्रक्रियामा रहेको आजको नागरिक दैनिकमा समाचार छ ।

सरकारले गत वर्ष (आव ०७४÷७५) आर्थिक वर्षको सुरुवाती तीन महिनाभित्रै लक्ष्यको लगभग आधा रकम उठाइसकेको थियो । साउन १ गते नै स्थानीयहतलाई बजेट पठाउनु परेकोले स्रोत जुटाउनका लागि ऋण उठाउनु परेको थियो ।

‘ सरकारको मुख्य आम्दानीको श्रोत राजस्व हो,’ अर्थ मन्त्रालयका एक उच्च अधिकारीले भने, ‘गतवर्ष निर्वाचन र बाढी पहिरोलगायतका कारण राजस्व कम संकलन भएपछि आर्थिक वर्षको सुरुवातमै ऋण उठाएर खर्च व्यवस्थापन गर्नुपरेको थियो ।’