हामी सबैकाे संसारन्यूज

१४ असोज, काठमाडौँ । भिसा लागेर पनि मलेसिया जान नपाएका नेपाली कामदारलाई नयाँ प्रक्रियाबाट आउन सरकारले आग्रह गरेको छ ।
भिसा लागेर पनि जान नपाएका करिब १७ हजार नेपाली कामदारलाई नयाँ प्रक्रियाबाट मलेशिया लैजाने प्रक्रिया सुरु गरिएको हो ।

गत जेठ दुई गतेदेखि सरकारले मलेसिया जाने कामदारमाथि विभिन्न शीर्षकमा आर्थिक शोषण गर्दै आएका संस्था बन्द गरेसँग त्यहाँ जाने प्रक्रिया पूर्ण रुपमा बन्द भएको थियो ।
सरकारले गत २ जेठबाट मलेसियाका लागि नयाँ श्रम स्वीकृति जारी नगरेपछि भिसा लागेर पनि मलेसिया जान नपाएका कामदारले फेरि सुरुदेखि नै प्रक्रिया अपनाउनु पर्ने श्रम तथा रोजगार मन्त्रालयका प्रवक्ता डाक्टर नारायण रेग्मीले जानकारी दिए ।

अनावश्यक बढी शुल्क लिएर कामदारमाथि शोषण गरेको भन्दे सरकारले कामदार मलेसिया पठाउन रोकेको थियो । भिसा लागेर आएपछि मलेसिया नजाने आप्रवासी कामदारलाई त्यहाँको अध्यागमन विभागले कालोसूचीमा राख्ने कानुनी व्यवस्था छ । भिसा लागेको कामदार म्यादभित्र मलेसिया नपुगे ५ वर्ष कालोसूचीमा राख्ने गरेको छ । हालै नेपाल सरकार र मलेसियाबीच कामदारको सबै खर्च रोजगारदाता कम्पनीले नै व्यहोर्ने सहमति भएको छ । सहमति अनुसार नै नयाँ प्रक्रियाबाट शुन्य लागतमा नै कामदार मलेशिया पठाईने श्रम मन्त्रालयले जनाएको छ ।