Sansar News
२२ माघ, वासिङ्टन । अमेरिकी रक्षा मन्त्रालयले मेक्सिकोसँगको सीमा क्षेत्रमा थप तीन हजार ७०० अमेरिकी सेना परिचालन गरेको छ ।
सीमा क्षेत्रमा यसअघि खटिएका कर्मचारीलाई सघाउन भन्दै अमेरिकाले तीन महिनाका लागि उनीहरूलाई पठाइएको जनाएको छ ।
सीमा शुल्क उठान र सिमाना रक्षाका लागि कूटनीतिक अधिकारीहरू पनि बढाइने पेन्टागनद्वारा जारी वक्तव्यमा उल्लेख छ ।
“उनीहरूलाई अहिले थप ९० दिनका लागि खटाइएको छ, सुरक्षा निकायहरूको सिफारिशका आधारमा फेरि निरन्तरता दिन पनि सकिनेछ, देशको दक्षिणी सिमानाको रक्षाका लागि उनीहरूलाई खटाइएको हो,” वक्तव्यमा लेखिएको छ ।
मेक्सिकोमा सीमा सुरक्षाका लागि बजेट छुट्याउने राष्ट्रपति डोनाल्ड ट्रम्पको प्रस्तावप्रति सांसदहरूले बिमति जनाएपछि सम्झौताको प्रयास भइरहेका वेला सिमा क्षेत्रमा थप सेना पठाइएको हो ।
राष्ट्रपति ट्रम्पले मेक्सिकोसँगको सीमा क्षेत्रमा पर्खाल लगाउनुपर्ने प्रस्ताव पटक पटक गर्दै आउनुभएको छ । पर्खाल लगाउनका लागि कोषको व्यवस्था नगरेमा राष्ट्रिय सङ्कट घोषणा गर्ने पनि उहाँले बताउनुभएको छ ।
उनले सन् २०१६ मा भएको राष्ट्रपतीय निर्वाचनका बेला मेक्सिकोसँगको सीमा क्षेत्रमा पर्खाल लगाउने चुनावी एजेण्डा मुख्य बनाउनु भएको थियो ।
उनको यो एजेण्डालाई कार्यान्वयन गर्नका लागि संसद्लाई छलेर गर्न सक्ने अवस्था छैन भने संसद्ले पनि यसलाई स्वीकार्न सकेको छैन । राष्ट्रपति ट्रम्पका लागि यो विषय निकै चुनौती बन्दै गएको छ ।
वि.सं.२०७५ माघ २२ मंगलवार १०:४१ मा प्रकाशित
