हामी सबैकाे संसारन्यूज

२८ फागुन, ओखलढुंगा । ओखलढुंगाको खिजिदेम्बा गाउँपालिका ४ को कुण्डली माविका शिक्षक सुजन सुनुवारले विस्कुट दिलाउने भन्दै प्रारम्भिक बाल बिकास (इसिडी) कक्षाका दुई बालकलाई जुत्ता चाट्न लगाएका छन् । अर्को बालकले खाइरहेको विस्कुट दिलाउने नाममा उनले चारवर्षका रिकेश नेपाली र आकाश दर्जीलाई सहपाठी जोन दर्जीको जुत्ता चाट्न लगाएका हुन् ।
आइतबार ती दुई बालकले आफ्ना अभिवाकलाई त्यस्तो कुरा बताएपछि परिवारले थाहा पाएको हो । ‘ जोनले खाइरहेको बिस्कुट खाने भए उसको जुत्ता चाट्न भनेर सरले भन्नु भएछ,’ रिकेशकी आमा पम्फा नेपालीले भनिन्, ‘छोराले घरमा आएर भनेपछि थाहा पाइयो । हाम्रा नानीहरुले विद्यालय पढ्न जाँदा पनि जुत्ता चाट्नपुर्ने ? दलित भने हेपियो, न्याय खोज्न कहाँ जानु ? सभ्य र शिक्षित बनाउन छोराछोरी विद्यालय पठाएको यस्ता घृणित कार्य घरमै बसेका भएपनि गर्दैनथे होला ।’
उता शिक्षक सुनज सुनुवारले बालकहरुलाई जुत्ता चाट्न नलगाएको बताएका छन् । उनले ६, ७ र ८ कक्षामा कम्प्युटर पढाउने गरेको बताए । कक्षा ८ सँगै रहेको इसिडी कक्षा नजिकै रहेको र उनी त्यहिको चौरमा बसिरहेका बेला तीनजना बच्चा त्यहि आएको र एकले विस्कुट झिकेको थियो । उनले भने, ‘अहिले नखाउ बाबु भनेर भन्दा मानेन, त्यसपछि मैले खुट्टा ढोग अनि विस्कुट दिन्छ भने । उनीहरुले खुट्टा ढोगे तर पनि बिस्कुट दिएन । यहि विषयलाई ठूलो बनाइएको हो । म कुन मोडमा थिए ।, सानो गल्ती गरेकै हुँ । स्विकार्छु ।’ मंगलबारको नयाँपत्रिका दैनिकमा ओखलढुंगाबाट पूर्णप्रसाद न्यौपानेले लेखेका छन् ।