१८ चैत, काठमाडौं । देशमा परेको हरेक विपत्तिमा गैरआवासीय नेपाली संघले अग्रणी भूमिका निभाएको हुन्छ ।

चाहे त्यो महाभूकम्प, बाढी पहिरो, अग्नि पीडित या अन्य दैवि प्रकोप । तत्कालका राहतका कार्यक्रम लिएर बढी प्रभावित क्षेत्रमा पुगिहाल्छ गैआवासीय नेपाली संघ । राहत सहयोगका लागि विश्वका झण्डै ८० देशमा रहेका आफ्ना शाखाहरुलाई तत्कालै परिचालन गरेर आर्थिक, नैतिक वा भौतिक सहयोग बोकेर पुगिहाल्छ एनआरएनए ।

आइतबार बारा र पर्सामा वर्षासहित आएको हावा हुरीका कारण २७ को मृत्यु र ४ सय भन्दा बढी घाईते भएका थिए । उनीहरुको उद्धार र राहतका लागि १० लाखको प्रारम्भिक कोष बनाएर एनआरएनएका उच्च पदस्थ त्यसतर्फ प्रस्थान गरिसकेका छन् ।

यसैबीच एनआरएनएका संस्थापक अध्यक्ष तथा संरक्षक डा. उपेन्द्र महतो आफ्नो मेडिकल टिम लिएर प्रभावित क्षेत्रमा पुगेर उपचारको काम थालिसकेका छन् भने एनआरएनएका बर्तमान उपाध्यक्ष कुमार पन्त, पूर्वउपाध्यक्ष रामेश्वर साह, पूर्वमहासचिव रतन कुमार झा, अनलराज भट्टराई, किरण नेपाल,सुजित महतलगायतको टोली प्रभावित क्षेत्रमा केही समयमा पुग्ने छन् ।
यसैविषयमा एनआरएनएका पूर्वउपाध्यक्ष रामेश्वर शाहले आफूहरुले खाद्य सामग्री र १५–२० जना स्वयंमसेवक लिएर जान लागेको बताएका छन् ।

‘ प्रभावित क्षेत्रमा अरु सबै सामग्री पुगे पनि खाद्य सामग्री कम भएको हाम्रा साथीहरुबाट थाहा पाएपछि चामल ५०० प्याकेट र त्यहि संख्यामा दाल, तेल र अन्य आवस्यक सामग्री लिएर जान लागेका छौं ।’ उक्त राहत प्रदेश २ को सरकारसँग समन्वय गरेर वितरण गरिने पनि साहले संसारन्युजलाई बताए ।

उनीहरुले त्यहाँको अवस्था अध्ययन गर्ने तथा तत्कालका १० लाखको राहत वितरण गरेर अन्य राहतका लागि सबै एनसीसीसँग छलफल गर्ने पनि एनआरएनएका केन्द्रीय कोषाध्यक्ष हिक्मत थापाले संसारन्युजलाई जानकारी दिएका छन् ।

कोषाध्यक्ष थापाका अनुसार सबै एनसीसीलाई सहयोगका लागि आग्रह गरिएको छ । उक्त सहयोग केन्द्रीय कार्यालयको संयोजनमा पीडित परिवारलाई वितरण गरिने पनि थापाले जानकारी दिएका छन् ।

गैरआवासीय नेपाली संघ एनसीसी जर्मनीका अध्यक्ष विजय मोक्तानले पनि पीडित परिवारको सहयोगका लागि २ लाख रुपैयाँ सहयोग गर्ने घोषणा गरिसकेका छन् ।

एनआरएनए जर्मनीले हावाहुरीबाट पीडितलाई २ लाख रुपैयाँ सहयोग गर्ने