हामी सबैकाे संसारन्यूज

२१ चैत, काठमाडौ । २ सय ७४ यात्रु बोकेर मंगलबार राति दुबई उड्नुपर्ने नेपाल वायुसेवा विमान व्यवस्थापकीय लापरबाहीका कारण ११ घण्टापछि बुधबार बिहानै मात्रै उड्यो ।

जहाज बेलैमा नउडाएको आक्रोशमा १ सय ५० भन्दा बढी यात्रु ८ घण्टासम्म पार्किङवेमा राखिएको विमानभित्रै बस्न बाध्य भए । जहाज नउड्ने भइपछि यात्रुलाई निकाल्न निगमका कर्मचारीलाई हम्मेहम्मे परेको थियो ।

विमानस्थल प्रहरीका अनुसार यात्रुले निगमविरुद्ध नाराबाजी गरेका थिए । केहीले जहाजमा राखेको मिल खाना आफै निकालेर खाए । केहीले बियरका बोतल खोलेर बसेको पनि देखियो, विमानस्थलका एक वरिष्ठ प्रहरीले भने । एक प्रहरीले ती यात्रुलाई बल प्रयोग नगरी सम्झाइबुझाइ गरेर निकालेको बताए । उक्त उडानमा अधिकांश नेपाली कामदार थिए ।

मंगलबार राति साढे ८ बजेदेखि बोर्डिङ गराइएका यात्रुलाई बुधबार बिहान ५ बजे विमानस्थलमा रहेको प्रहरीको सहायतामा अफ बोर्ड गराइएको थियो । बिहीबारको कान्तिपुर दैनिकमा सुरज कुँवरले लेखेका छन् ।