Sansar News
१० बैशाख, काठमाडौं । पूर्वमन्त्री तथा नेपाली कांग्रेसका नेता रामकृष्ण ताम्राकारको मृत्यु भएको छ ।
दुई वर्षदेखि निमोनिया र क्यान्सर रोगले पीडित भएका पूर्वमन्त्री ताम्राकारको उपचारका क्रममा ललितपुरको अल्का अस्पतालमा मंगलबार दिउँसो मृत्यु भएको जनाइएको छ ।
रुपन्देहीको सिद्धार्थ नगरपालिका भैरहवा निवासी ताम्राकारको स्वास्थ्यमा गम्भीर समस्या देखिएपछि चैतको अन्तिममा अल्का अस्पतालमा उपचारका लागि ल्याइएको थियो ।
नेपाली कांग्रेसका केन्द्रीय कोषाध्यक्ष समेत भइसकेका ताम्राकार २०४८ र २०५६ मा रुपन्देही २ बाट प्रतिनिधिसभा सदस्यमा निर्वाचित भएका थिए ।
विक्रम सम्बत २००० मा भोजपुरको टक्सारमा जन्मिएका ताम्राकार उद्योग तथा वाणिज्य र स्वास्थ्यमन्त्री बनेका थिए ।
वि.सं.२०७६ वैशाख १० मंगलवार १८:५७ मा प्रकाशित
