हामी सबैकाे संसारन्यूज

५ जेठ, काठमाडौँ । चालु आवको नौ महिनामा नेपालको व्यापार घाटा झण्डै १० अर्ब पुगेको तथ्यांक सार्वजनिक भएको छ । भन्सार विभागले सार्वजनिक गरेको पछिल्लो नौ महिनाको तथ्यांकमा नौ महिनाको अवधिमा नेपालको व्यापार घाटा मात्रै ९ खर्ब ९१ अर्ब ७८ करोड ८८ लाख ५५ हजार बराबरको पुगेको हो ।

नौ महिनामा १० खर्ब ६१ अर्ब ६१ करोड १२ लाख ४ हजार बराबरको आयात भएको छ । सोही अवधिमा ६९ अर्ब ८२ करोड २३ लाख ४८ हजार बराबरको मात्रै सामान निर्यात भएको छ ।

१ सय २८ मुलुकसँग व्यापार घाटा
नेपालले व्यापार गर्ने मुलुकमध्ये १ सय २८ वटासँग व्यापार घाटा हुने गरेको उक्त तथ्याङ्कमा उल्लेख छ । विश्वका १ सय ५१ वटा मुलुकसँग द्विपक्षीय व्यापार गर्ने गरेकोमा १ सय २८ मुलुकसँग व्यापार घाटा रहेको उल्लेख छ । आयात बढ्दै गए पनि सो अनुपातमा निर्यात बढ्न नसक्दा धेरै देशसँग व्यापार घाटा बढ्दै गएको हो ।

२३ मुलुकसँगको भने व्यापारमा नाफा देखिएको छ । व्यापार नाफामा रहेका मुलुकको कारोबार पनि अत्यन्त न्युन रहेको छ । छिमेकी मुलुक चीन र भारतसँगको व्यापार घाटा सबैभन्दा बढी छ । सबैभन्दा बढी व्यापार घाटा भारतसँग रहेको छ । नौ महिनाको अवधिमा भारतबाट ६ खर्ब ८६ अर्ब ८५ करोड ८० लाख २२ हजार बराबरको सामाना आयात भएको छ भने नेपालबाट ४४ अर्ब १८ करोड ६२ लाख ८३ हजार बराबरको मात्रै निर्यात भएको छ । जसअनुसार भारतसँग ६ खर्ब ४२ अर्ब ६७ करोड १७ लाख ३९ हजार बराबरको व्यापार घाटा रहेको देखिन्छ ।
चीनसँग नेपालको व्यापार घाटा १ खर्ब ५२ अर्ब ४४ करोड २३ लाख ४० हजार रहेको छ ।

त्यसपछि क्रमश संयुक्त अरब इमिरेट्स(युएई), फ्रान्स, इन्डोनेसिया, थाइल्याण्ड, क्यानडा, मलेसिया, स्विट्जरल्याण्ड, अमेरिका, अर्जेन्टिना, भियतनाम, साउदी अरब, लगायतका देश रहेका छन् ।

युएईसँगको नेपालको व्यापार घाटा २६ अर्ब ७० करोड ४ लाख ६२ हजार बराबरको छ । २६ अर्ब ८१ करोड ९१ लाख ९५ हजार बराबरको सामाना आयात हुँदा ११ करोड ८७ लाख ३३ हजार बराबरको मात्रै निकास भएको छ ।

नाफामा पनि नेपालको व्यापार
केही देशसँग भने नेपालको व्यापार नाफामा रहेको तथ्यांकमा देखिन्छ । अल्जेरिया एन्टिगुवा, बर्मुडा, न्यू क्यालेडोनिया, अजरबैजान, पानामा भने नेपालले सामान निर्यात गरी नाफा गरेको छ । अल्जेरिया ६ करोड ८६ लाख ४७ हजार, एन्टिगुआ र बर्मुडा २ लाख ७८ हजार, न्यू क्यालेडोनिया १ करोड ६६ लाख ६१ हजार, गुयना २८ लाख ५१ हजार, अजरबैजान १८ लाख ८४ हजार र पानामा २३ लाख १६ हजार बरारबको सामान निर्यात भई नाफामा रहेको छ ।