हामी सबैकाे संसारन्यूज

५ भाद्र, काठमाण्डौं । फिल्म क्षेत्रका वरिष्ठ निर्देशक किशोर रानाको ६४ वर्षको उमेरमा निधन भएको छ ।

लामो समयदेखि मिर्गौलाको रोगले पीडित रहेका रानाको बुधबार उपचारका क्रममा निदान अस्पतालमा मृत्यु भएको हो ।

नेपाली चलचित्र इतिहासमै वरिष्ठ निर्देशक रहेका राना दुवै मिगौलामा खराबी तथा निमोनियाले समेत ग्रसित थिए । उनी पाँच महिनादेखि नियमित डायलासिसमा रहेको बताइएको छ । मिर्गौला प्रत्यारोपणका लागि प्रयास भइरहेको थियो ।

२००७ सालमा सुनसरीमा जन्मिएका उनी ‘कान्छी फिल्म’ मा सहायक निर्देशक भएर नेपाली फिल्म क्षेत्रमा प्रवेश गरेका थिए । बलिउडमा समेत १५ वर्ष काम गरेका राना २०५१ सालमा चलचित्र ‘कर्जा’ बाट निर्देशनमा डेब्यु गरेका थिए । रानाले करोडपति, राँको, सीमा रेखा, एक नम्बरको पाखे, बन्धकी लगायतका चलचित्रको निर्देशन गरेका थिए । उनी चर्चित गायिका संगीता राना प्रधानका श्रीमान् हुन् ।

पछिल्लो समय चलचित्र प्रतिबिम्ब निर्माणकै क्रममा रहेका निर्देशक रानाले आफ्नो स्वास्थ्य भन्दा पनि कामलाई महत्व दिने गरेका कारण पनि यस्तो अवस्था आएको बताइएको छ ।