Sansar News
५ भदौ, हेटौँडा । प्रदेश ३ सरकारको मन्त्रिपरिषद् बैठकले प्रदेश लोकसेवा आयोग गठन गर्नेलगायत तीन वटा निर्णय गरेको छ ।
प्रदेशका मुख्यमन्त्री डोरमणि पौडेलको अध्यक्षतामा बुधबार साँझ सम्पन्न मन्त्रिपरिषद् बैठकले प्रदेश लोकसेवा आयोग गठन गर्ने, प्रदेश एकीकृत अनुदान व्यवस्थापन कार्यविधि २०७६ को मस्यौदा स्वीकृत गर्ने र प्रदेशको उद्योग, पर्यटन, वन तथा वातावरण मन्त्रालयअन्तर्गतको पर्यटन विकास आयोजनाका लागि अस्थायी दरबन्दीलाई स्वीकृति दिने निर्णय गरेको प्रदेशका आर्थिक मामिला तथा योजनामन्त्री तथा सरकारका प्रवक्ता कैलाशप्रसाद ढुङ्गेलले जानकारी दिए ।
बैठकले प्रदेश लोकसेवा आयोगको गठन, काम कर्तव्य अधिकार र कार्याविधिका सम्बन्धमा व्यवस्था गर्न बनेको विधेयक प्रदेशसभामा पेस गर्ने निर्णय गरेको मन्त्री ढुङ्गेलले जानकारी दिए ।
प्रस्तुत विधेयक प्रदेशसभामार्फत पारित भएपछि प्रदेशमा लोकसेवा आयोग गठन हुने उनले बताए । प्रदेशसभाबाट विधेयक पास भएपछि आयोग गठनसँगै कर्मचारी भर्ना गर्ने बाटो खुल्ने उनले बताए । मन्त्रिपरिषद्ले पर्यटक विकास आयोजनामा अस्थायी दरबन्दी स्वीकृत गर्ने निर्णय गरेको छ ।
पर्यटनको क्षेत्रमा काम गर्नुपर्ने पर्यटन विकास आयोजनामा यसअघि प्राविधिकको दरबन्दी नहुँदा आयोजनाको धेरै काममा समस्या भएको थियो । मन्त्रिपरिषद्को निर्णयपछि आयोजनाको काम गर्नका लागि बाटो खुलेको जनाइएको छ ।
वि.सं.२०७६ भदौ ५ बिहीवार १४:१४ मा प्रकाशित
