हामी सबैकाे संसारन्यूज

१२ मंसिर, दमक । गाडीमा नै जलाएर हत्या गरिएका झापाका एक चालकको हत्यामा संलग्नलाई तत्काल कारबाही गर्न झापाका यातायात व्यवसायी तथा मजदुर सङ्घ सङ्गठनले माग गरेका छन् ।

रामेछापको निगलापानी भन्ने स्थानमा गाडीमा नै जलेको अवस्थामा भेटिएका लखनपुर–१ का २५ वर्षीय विशाल खड्काको नियोजित ढङ्गबाट हत्या भएको भन्दै जिल्लाका यातायात व्यवसायी तथा मजदुरजन्य सङ्घसंस्थाले कारबाहीको माग गरेका हुन् ।

शनिबार दमकमा संयुक्त पत्रकार सम्मेलन गर्दै नेपाल यातायात मजदुर सङ्घ, नेपाल ट्रेड युनियन, कनकाई यातायात सङ्घ र मेचीनगर ट्याक्सी व्यवसायी सङ्घले हत्यामा संलग्नको तत्काल पहिचान गरी कारबाही गर्न माग गरेका हुन् ।

पत्रकार सम्मेलनमा बोल्दै नेपाल यातायात मजदुर सङ्घका जिल्ला वरिष्ठ उपाध्यक्ष विश्वासकुमार काश्यपले यो घटनाले यातायात चालकको पेसा नै खतरामा परेको बताउनुभयो । उहाँले भन्नुभयो – “यो घटनाको तत्काल छानबिन गरी दोषीलाई कारबाही गर्नुपर्छ होइन भने हामी चरणबद्ध आन्दोलन गर्छौं ।”

मे १ झ २१८७ नंको टाटासुमो चलाएर काठमाडौँदेखि पूर्वतर्फ आउँदै गरेका खड्काको गत मङ्सिर ९ गते रामेछापको निगलापानी भन्ने स्थानमा पछाडिको सिटमा राखी जलाएर हत्या गरिएको अवस्थामा भेटिएको थियो । पत्रकार सम्मेलनमा पूर्वाञ्चल यातायात व्यवसायी सङ्घका पूर्व अध्यक्ष गङ्गा सिटौलाले शव भेटिएको प्रकृति हेर्दा यो नियोजित ढङ्गबाट हत्या भएको भन्दै हत्यारालाई तत्काल सार्वजनिक गरिनुपर्ने माग गर्नुभयो ।

ती सङ्गठनले घटनाको कडा शब्दमा भत्र्सना गर्दै २४ घन्टाभित्र हत्यारा सार्वजनिक गर्न प्रशासनलाई अल्टिमेटमसमेत दिएको बताएका छन् । घटनास्थल पुग्नुभएका सिटौलाले उक्त घटना भवितव्य हुन नसक्ने भन्दै पाशविक तवरले हत्या नै भएको दाबी गर्नुभयो ।

मृतकको शव अझै परीक्षण हुन सकेको छैन । उनको शव परीक्षणका लागि काठमाडौँस्थित शिक्षण अस्पतालमा राखिएको बुझिएको छ ।