Sansar News
२५ कात्तिक, काठमाण्डौं । मन्त्रिपरिषद् पुर्नगठनको विषयमा नेकपामा सघन छलफल सुरु भएको छ । जसमा आठ मन्त्री र प्रदेश मुख्यमन्त्री र मन्त्रीहरु समेत फेरिने बताइएको छ ।
प्रधानमन्त्री केपी शर्मा ओली र नेकपाका अध्यक्ष पुष्पकमल दाहाल बीच आइतबार यसबारेमा गम्भीर छलफल भएको बताइएको छ ।
स्रोतका अनुसार कम्तीमा आठ मन्त्री फेर्ने तयारीमा सरकार रहेको छ । शिवमाया तुम्बाहाम्फेलाई उपसभामुखबाट राजिनामा गराएर मन्त्री बनाउन दुवै अध्यक्ष तयार भएको बताइएको छ । ओलीले प्रदेशका मुख्यमन्त्री र मन्त्री फेरबदलको संकेत समेत गरेको स्रोतले बताएको आइतबारको अन्नपूर्णपोष्ट दैनिकमा समाचार छ ।
सरकारलाई नयाँ शिराबाट अगाडि बढाउने चाहना ओलीले सुनाएका थिए । सरकारलाई नयाँ गति दिन पनि मन्त्री हेरफेरको समय आएको र त्यसको तयारीमा आफू रहेको उनको भनाई थियो ।
प्रधानमन्त्री निवास वालुवाटारमा भएको छलफलमा दुई अध्यक्षसँग गृहमन्त्री रामबहादुर थापा पनि सहभागी थिए । उनीहरुबीच झण्डै तीनघण्टा छलफल चलेको थियो ।
वि.सं.२०७६ कात्तिक २५ सोमवार ०८:४८ मा प्रकाशित
